Sámi oahpponeavvuide ii leat árvaluvvon lasáhus. Čájáhusgovva

– Dát lea stuorámus hástalus

Sámediggeráđđi lea beahtahallan go ráđđehus ii leat lasihan juolludemiid sámi oahpponeavvuide

14:29 Golggotmánu 07. beaivi 2015

Máhttodepartemeantta lea stádabušeahta bokte árvalan juolludit 41,5 miljovnna sámi oahpponeavvuid várás, dát lea 1,2 miljovnna eambbo go diibmá. Liikká Sámediggeráđđi ii leat duđavaš, go dát ii olat dábálaš haddegoargŋuma.

Ráđđehusa árvalusas celket:

«Doarjaga mihttu lea searvat ruhtadeapmái Sámedikki oahpahusulbmiliidda, dasa gullá maiddái sámi ohppiid oahpponeavvuid buvttadeapmi ja ovdáneapmi. Doarjagii lea vuoruhuvvon mihttun ahte sámi oahppit jođáneappot ja buorebut ožžot oahpponeavvuid iežaset gillii»

 

– Buot stuorámus hástalus lea dat go Máhttodepartemeantta ii leat dán jagi ge vuoruhan lasihit ruhtadeami sámi oahpponeavvuide, lohká sámediggeráđđelahttu Silje Karine Muotka.

– Mii leat geavahan olu politihkalaš návccaid dán áššái ja lean behtohallan. Mun boađán čuovvolit ášši ja oččodit Stuorradikki áddet man dehálaš dát ášši lea go de galget meannudit bušeahta.

 

Ii buorránan vaikke cuiggoduvvo

ON nállevealahanlávdegoddi (CERD) dán jagi garrasit moittii Norgga go rihkkot sámi mánáid giella- ja oahpahusvuoigatvuođaid. Lávdegoddi cuiggodii ahte sámi oahpponeavvuid ruhtadeamis lea systemáhtalaš váilevašvuohta, erenoamážit julev- ja máttasámi ohppiid oahpponeavvuid dáfus.

– Mii leat ráđđehussii ovddidan ahte boahtte jahkái lea mis 59 miljovnna ruvdnosaš bušeahttadárbu oahpponeavvosuorgái. Ráđđehusa vástádus lea ahte ii lasit maidege. Dát lea čielga diehtu ráđđehusa bealis. Mii sávvat ahte Stuorradikkis lea áibbas eará diehtu go meannudit bušeahta lohká Muotka.

 

Vuoruhan mánáidgárdedoarjaga

Vaikke Muotka lea ge beahtahallan oahpponeavvuid dáfus, de gávdná son ge buriid beliid ráđđehusa stádabušeahttaárvalusas. Ráđđehus árvala doarjut sámi mánáidgárddiin 16,1 miljovnnain, dát lea 500 000 eambbo go 2015 bušeahtas.

– Doarjja sámi mánáidgárddiide gal čuovvu haddegoargŋuma, dat gal lea buorre, lohká Muotka.

 

Son muittuha ahte máŋgga sajis sámis váilot mánáidgárdesajit sámi mánáide, ja namuha gávpogiid nu mo Álttá ja Tromssa.

– De lea hui dehálaš ahte geahččalat čoavdit dáid hástalusaid ovttasráđiid guovddáš eiseválddiiguin. Dát lasáhus ii čoavdde visot, muhto lea buorre go ráđđehus oaidná dán dehálaš suorgin, loahpaha Muotka.

På forsiden nå