Almmuhus

Almmuhus

Eai nagodan giktalit nuoraid čállit vaikke gulle ulbmiljovkui

Go váilot girjjit sámi nuoraid várás, de galggai Sámi girječállioahppu maiddái nuoraid movttiidahttit čállit, muhto eanaš oasseváldiin leat badjel 40 jagi boarrásat. Boarráseamos oasseváldi lea badjel 50 jagi ja nuoramus ges 20-jahkásaš. Čájáhusgovva.

Girječállioahppu mii galggašii nuoraid giktalit čállit nuoraide ii geasut dán ulbmiljoavku, eanaš oassi oasseváldiin leat badjel 40-jahkásaččat.

Published date: 
Gaskavahkku, 1 Suoidnemánu, 2015 - 15:40
Updated at: 
Ođastuvvon: 01.07.2015 - 17:09
Fáddásánit: 

Girječállioahpu oasseváldit galget čállit nuoraid várás, ja áigumuš lei hástalit nuorra čálliid álgit ohppui. Oahpus leat logi oasseváldi, muhto golmmas leat gaskal 20-30 jagi boarrásat.

 – Mii háliideimmet olahit nuoraide dahje sidjiide geat háliidit čállit nuoraide. Dien dáfus ulbmil lea ollašuvvan ja leat duhtavaččat, lohká prošeaktajođiheaddji Piia Susanna Juuso.

 

Boarráseamos badjel 50 jagi

Sámediggi ja Sámi Girječálliid Searvi jođiheaba vuosttaš sámi girječállioahpu mii álggahuvvui go lea dárbu eanet nuoraidgirjjiide ja nuorra čálliide. Oahppu bistá guokte jagi ja oahpu áigge oasseváldiid čállosiin almmuhuvvo girječoakkáldat. Sámi nuoraide almmuhuvvojit eanet lohkamušat, muhto ođđa nuorra girječállit eai šatta beare galle. Oahpu boarráseamos oasseváldi lea badjel 50 jagi boaris. Prošeaktajođiheaddji ii jáhke dattege dán čuohcat sámi girjjálašvuhtii.

 – Stuora servodagas eai ge leat nuorat geat čállet nuoraide, muhto leat rávisolbmot geat ovdamearkka dihte leat čállán «Harry Potter» ja «Twilight» nuoraidgirjjiid, čilge Juuso.

 


Sámi girječállioahpu prošeaktajođiheaddji Piia Susanna Juuso. Vuorkágovva: Inga Marie Guttorm

 

Soaitá eará jurddašanvuohki

Girječállioahpus lei vuosttaš čállinbádji mannan vahkkoloahpa, ja prošeaktajođiheaddji muitala ahte lea lohkan oasseváldiid čállosiid.

 – Oasseváldit čállet máŋggalágan fáttáid birra, nu ahte jáhkán buot nuoraide gávdnot juoidá maid lohkat. Lean hui luohttevaš ja jáhkán oasseváldiid lihkostuvvat olahit nuorra lohkkiid go fal muitet geasa čállet. Dálá nuorat soitet jurddašit veahá eará láhkai go rávisolbmot, muhto mii leat buohkat oktii leamaš nuorat, nu ahte dát ii leat áibbas amas oasseváldiide. Oasseváldiin leat maiddái bagadallit geain sii ožžot čáledettiin veahki ja máŋggas dáin leat čállán nuoraidgirjjiid, lohká son.

 

Oadjebasvuohta ohcat nuppes

Sámi girječállioahpu prošeaktajođiheaddji, Piia Susanna Juuso jurddašallá ahte girječállioahppu ii soaitte nu heivvolaš joatkkaskuvllaahkásaččaide go soaitá lossat čađahit girječállioahpu ovttas skuvllain. Son lohká dattege boahtte áiggis sáhttit buorebut hástalit nuorat oasseváldiid.

 

 – Mii leat sihkkarit viisábut guovtti jagi geahčen, ja dalle diehtit mihá eanet mii doaimmai dán oahpus ja maid sáhttit dahkat buorebut. Dalle dihtet maiddái olbmot eanet oahpu birra ja dalle soitet nuorat oadjebasat ohcat ohppui, muhto ii leat dieđusge mearriduvvon lea go nuppes seamma ulbmiljoavku go dál, loahpaha Juuso.

 

Girječállioahppu lea oasseáiggis, ja oasseváldit eai oaččo oahppočuoggáid oahpus nu go alitoahpuin ožžot.

På forsiden nå