Arctic Race of Norway beaivválaš jođiheaddji Knut-Eirik Dybdal (gurut bealde) ja Bufetat guovlludirektevra Pål Christian Bergstrøm leaba soahpan ovttasbargat golbma jagi háhkandihti lassi biebmoruovttuid Davvi-Norggas. Preassagovva.

Sihkkelgilvu háhká veahkkin ođđa biebmoruovttuid

Davvi-Norggas lea stuora hástalus háhkat ođđa biebmoruovttuid, danin geahččala Bufetata ođđa vugiid vai lihkostuvaše háhkat 270 ođđa biebmoruovttu dán jagi. Arctic Race of Norway sihkkelgilvu galgá čalmmustahttit biebmoruovttuid dárbbu ja dehálašvuođa.

12:18 Geassemánu 10. beaivi 2015
Ođastuvvon: 10.06.2015 - 12:55

Mánáid-, nuoraid- ja bearašetáhta (Bufetat) lea vuolláičállán ovttasbargošiehtadusa Arctic Race of Norway sihkkelgilvvuin. Ovttasbargu bistá álgovuorus golbma jagi. Áigumuš lea čalmmustahttit mánáid ja nuoraid dárbbu bajásšaddat oadjebas ruovttuin Davvi-Norggas.

 – Go lea nu stuora hástalus háhkat ođđa biebmoruovttuid, de leat ferten hutkáivuođa geavahišgoahtit. Mii leat hui duhtavačča go Arctic Race of Norway oaidná dehálašvuođa ovttasbargat ja dán láhkai čalmmustahttit dárbbu háhkat biebmoruovttuid, lohká Bufetat davvi direktevra Pål Christian Bergstrøm.

 

Dárbbašit 270 ođđa biebmoruovttu

Dárbu ođđa biebmoruovttuide lassána jagis jahkái. Diibmá fertii Bufetat háhkat 200 ođđa biebmoruovttu Davvi-Norggas, dán jagi lea dárbu ges 270 ođđa biebmobearrašii.

 – Lea viehka stuora dárbu biebmobearrašiidda go dárbbašat badjel 250 ođđa biebmoruovttu dán jagi. Diibmá eat olahan ollásit 200 ođđa biebmoruovttu, muhto Arctic Race of Norway ovttasbargguin jáhkkán olahit dán jagi ulbmila johtilit ja doaivvun min gávdnat vel eanet biebmoruovttuid, čilge Bergstrøm.

 

Bufetat oidnosis

Arctic Race of Norway lea Davvi-Norgga sihkkelgilvu mii lágiduvvui vuohččan 2013:s. Dán jagi sihkkelvuolgga lea Harstad gávpogis, sihkkelastit galledit maiddái Evenskierri, Setermoena, Finnsnesa, Málatvuomi ja Narviika. Jurdda lea čalmmustahttit Bufetata sihke vuolggasajis ja moallasajis, dasa lassin galgá Bufetata maiddái oidnosis eará doaluiguin mat lágiduvvojit sihkkelgilvvu olis.

 – Arctic Race of Norway lea Davvi-Norgga stuorámus valáštallanlágideapmi ja sin bokte olahat oallugiidda miehtá Davvi-Norgga. Mii sáhttit earret eará lágidit mánáid sihkkelastimii ja dán láhkai čalmmustahttit dárbbu biebmoruovttuide, lea dušše fantasiija mii bisseha márkanfievrredanvugiid, lohká Bergstrøm.

 

Rihkkot mánáid vuoigatvuođaid

Buot mánáin lea vuoigatvuohta bajásšaddat ruovttuin cealká ON:a mánáidkonvenšuvdna, muhto Davvi-Norggas leat badjel 60 máná ja nuora geat leat gártan institušuvnnaide fárret váilevaš biebmoruovttuid geažil.

 – 64 máná ja nuora vuoigatvuođa rihkkojuvvojit, sii gártet vuordit institušuvnnain vaikke eai dárbbaš makkárge divššu, muitala Bufetat davvi direktevra Pål Christian Bergstrøm.

Oččodandihti ođđa biebmoruovttuid lea Bufetat ásahan sierra prošeaktavirggi márkanfievrrideapmái, ja ná fuomášedje ge bovdet Arctic Race of Norway ovttasbargui.

 – Mii joatkit ain háhkat biebmoruovttuid almmuhusaid ja ruovttugalledemiid bokte, mii vuoruhat maiddái ain doaluid gos olu olbmot čoahkkanit. Dasa lassin leat mis Davvi-Norgga sátnejođiheaddjit ambassadevran ja mii geavahit sosiála mediaid viššalit, lohká Bergstrøm.

 

Gudnijahttet biebmoruovttuid

Arctic Race of Norway galgá maiddái gudnijahttit biebmobearrašiid ja čalmmustahttit biebmoruovttuid dehálašvuođa. Mánát ja nuorat ollašuhttet birgejumi ja buriid vásáhusaid biebmoruovttuin.

 – Mii háliidit rámidit biebmoruovttuid go sii čađahit erenomáš dehálaš barggu. Dán áŋggirdeami jáhkkán olu olbmuid sáhkkiivuođa boktit ja doaivumis leat olu bearrašat mat háliidit gávnnahit heivejit go sii biebmoruoktun, loahpaha Bergstrøm.

Fáddásánit
Ođđasat

På forsiden nå