OĐĐA RADARVUOGÁDAT: Ná plánejit hukset ođđa radarvuogádaga Ivgobahtii. Dát šaddá stuorámus riikkaidgaskasaš dutkanrusttet Norggas. UiT čájáhusgovva

Norgga stuorámus radarvuogádat plánejuvvon Ivgobahtii

Dutkanráđđi lea juolludan 288 miljovnna hukset ja doaimmahit EISCAT 3D, mii lea ođđa radarvuogádat Davvi-Skandinavias. UiT Norgga árktalaš universitehta hoide norgga beali dán eurohpálaš prošeavttas mii šaddá dehálažžan gomuvuođa ja dálkkádatdutkamiin.

10:26 Geassemánu 19. beaivi 2015

Gaskavahkku almmuhii Dutkanráđđi ahte juolludit 288 miljovnna ruvnnu hukset ja hoidet ođđa radarvuogádaga mii galgá dutkat atmosfeara davvin. Dát radar šaddá riikkaidgaskasaš dutkanrusttegiid searvvis dat stuorámus rusttet mii Norgga nannámis lea. Earret eará galgá Ivgobahtii huksejuvvot ođđa anteanna.

EISCAT

UiT lei mielde vuođđudeames EISCAT 1972:s ja lea álggu rájes hovden EISCAT rusttegiid Norggas.

 

EISCAT:s lea leamaš stuorra mearkkašupmi UiT luonddudiehtaga ja teknologiija dutkamiidda ja oahpuide.

 

EISCAT lea riikkaidgaskasaš dutkanovttasbargu gaskkal Norgga, Ruoŧa, Suoma, Stuorra-Británnia, Japána ja Kiinná. Dasa lassin oassálastet maiddái Fránskariika, Ruošša ja Ukraina assosierta mielláhttun. EISCAT jođiha guokte radar-rusttega Norggas.

 

EISCAT:s leat maid guokte smávit stašuvnna Gironis ja Soađegilis.

 

Váldoguovddáš lea Gironis.

Máhttoministtar Torbjørn Røe Isaksen lohká dán nannet gomuvuođadutkan- ja gomuvuođaindustriijabirrasa.

 

UiT njunnošis

UiT Norgga ártkalaš universitehta galgá koordineret norgga oasi dán eurohpálaš ovttasbarggus.

– Mii leat hui ilus ja giitit juolludeami ovddas maid EISCAT 3D lea ožžon, lea dárbbašlaš ođasmahttit rusttegiid mat dutket olggut atmosfeara. EISCAT-anteanna mii lea leamaš Ramfjordmoenis lea leamaš dehálaš, muhto lea boarásnuvvan ja dáinna ođđa juolludemiin sáhttá Norga searvat riikkaidgaskasaš dutkifierpmádahkii mii sáhttá ovdánahttit gomuvuođadutkama oalle sákka, dadjá UiT rektor Anne Husebekk preassadieđáhusa bokte.

 

 

Fáddásánit
Ođđasat

På forsiden nå