Almmuhus

Almmuhus

– Lea dušše dádjunlávlla. Ii das leat oaivil, what so fucking ever!

SNOALOSRAPPA HÁRBMADA: Slincraze ođđa lávlla man ikte almmuhii videoin, lea hárbmadan. Govvamontáša

SlinCraze ođđa lávlla moitojuvvo leat nissonvealaheaddjin. Su manager lohká ođđa snoaloslávlaga leat dušše dábálaš lávllan, ja bivdá heaitit buot atnimis nu duođalažžan.

Published date: 
Duorastat, 4 Geassemánu, 2015 - 15:29
Updated at: 
Ođastuvvon: 04.06.2015 - 16:39
Fáddásánit: 

Sámi beakkán rap-artista Slincraze almmuhii ikte ođđa lávlaga oktan videoin, mas teaksta lea aivve snoalus. Ná lea oassi lávlagis man oainnát videos vuolimusas:

“Hey, ale mu guit doaškal!, ii leat earágo snusa doassa… …luoitte Slinna reaŋgga sisa, vuoi besse seaŋggas gišvvardit ja, don leat nu fuoras álo cihpa siđat.”

 

 –Roavis ja nissonvealaheaddji

Kárášjohkalaš Anne Márjá Guttorm Graven, gii earret eará leamaš musihkkadovdi sámi mediain, lea sakka beahtahallan Slincrazei, ja lohká dán leat roavva, nissonvealaheaddji lávllan.

 


OAŽŽU HEAJOS DOVDDU: Kárášjohkalaš Anne Márjá Guttorm Graven, lea hirbmosit beahtahallan Slincrazei, ja lohká dán leat roavva, nissonvealaheaddji lávllan. 

– Dán teavsttas ii leat nieiddas makkárge árvu. Dat mii mu mielas lea vearrámus lea go nieiddat fertejit vásihit vuos badjelgeahčči albmáid ja gánddaid ja seksa masa eai háliit searvat. Sii veagalváldojit, bilkiduvvojit ja badjelgehččojuvvot, ja dasa lassin fertejit vel gullat badjelgeahčči sániid feasttas ja konsearttas. Ii leat ortnegis ii ge dohkke leaikan, dadjá Guttorm Graven.

 

Guktii veahkaválddálaš

Son lohká erenoamáš vearrái go aitto leat gullan mediain ahte sámenissonat vásihit eanet seksuálalaš illásteami go eará nissonat ja go NBR-jođiheaddji aitto lea muitalan son áitojuvvo doaimmastis ja cielahuvvo go lea nissonolmmoš.

– Livččii eará jus eai livčče dát áššit ja jus mis livččii dásseárvu. Muhto nu guhká go ii leat, lea erenoamáš dehálaš ahte smiehttá makkár guottuid ovddida. Munnje gal addá dušše váivves dovddu diet lávlla, dadjá son.

 

– Leat go du mielas buot rappat unohasat main leat snollosat?

– Gal Slincrazes leat leamaš roavva rappat ovdal, muhto ii ná čielgasit boahtán ovdan ahte nieiddas ii leat árvu. Ja guktii vel boahtá ovdan dát. Vuos go bilkida nieidda gii doaškala go ii fuola sus, ja nuppes go áigu šlivget nieidda láhttái. Addá veagalváldin dovddu. In leat ovdal reageren ná garrasit, dadjá son Ávvirii.

 

ČUOVO MAID DIGAŠTALLET ÁNNE MÁRJJÁ SIIDDUS (Dása ii dárbbaš olbmos leat facebook-profiila):

 

Mii leat áiddo gullan ahte sámenissonat vásihit eanet seksuálalaš illásteami go eará nissonat (ášši:…

Posted by Ánne Márjá Guttorm Graven on 4. June 2015

 

– Dušše dádju

Slincraze ieš, dahje Nils Rune Utsi duođašta son lea lohkan Guttorm Gravena moaitagiid Facebookas, muhto ii hálit kommenteret ášši.

Ikte dattege dajai son Ávvirii ahte son liiko stoahkat musihkain.

– Dat lea somás dánsunšuokŋa mas lea veahá snoallan, muhto nu sáhttá leat muhtumin ráppas, dajai SlinCraze.

Odne vástida su manager Lars Svehagen:

– Ii hal dál leat šat 1999. Ii ge ábut nu duođalažžan atnit juohkediŋgga. Ii lávlla ii ge Slincraze leat nissonvealaheaddji. Dat lea dušše dádjunlávlla maid lea ráhkadan maŋemus áiggi. Ii das leat makkárge oaivil, what so fucking ever, dadjá Svehagen.

 

– Dábálaš baikaságat

Slincraze álggii iežas musihkkakarriera go rappii givssideami vuostá. Manager gal šiitá ahte son lea šaddan vealaheaddjin ieš.

– Ii leat givssideapmi ii ge vealaheapmi. Dákkár teavsttat leat áibbas dábálaččat pop-máilmmis. Lea dábálaš lávlla mas leat dušše baikaságat. Nie dat lea hip-hop máilmmis, dadjá son.

 

På forsiden nå