Almmuhus

Almmuhus

– Áigut ávvu­doaluiguin gudne­jahttit Ávvira lohkkiid

GERGOSAT ÁVVUDIT: Ávvira neahttadoaimmaheaddji Berit Marie Lise Eira ja váldodoaimmaheaddji Kari Lisbeth Hermansen illudeaba dán jagi ávvudit dan go Ávvir lea ilbman jo logi jagi. Govven: Nils Johan Vars

Ávvudoalut, ođasmahtton neahttasiidu ja digitála vuorká leat oassin Ávvira logi jagi ávvudeamis.

Published date: 
Vuossárga, 5 Guovvamánu, 2018 - 16:35
Updated at: 
Ođastuvvon: 16.02.2018 - 15:11
Fáddásánit: 

– Mii áigut olles jagi čalmmustahttit Ávvira logi jagi beaivvi.  Lohkkit bovdejuvvojit guossin min lusa, bovdejuvvojit searvat iešguđetlágán gilvvuide ja hástalusaide ja oažžut buriid fálaldagaid jagi mielde.  Ávvir ilmmai vuosttaš geardde guovvamánu 6.  beaivvi 2008.  Dán dieđusge čalmmustahttit ja háliidit ge dan beaivvi bovdet lohkkiideamet finadit min guossis sihke Kárášjoga ja Guovdageainnu doaimmahusain.  Doppe besset lohkkit oaidnit min bargoárgabeaivvi ja mii guossuhit herskuid ja lágidit gilvvuid main min lohkkit sáhttet vuoitit vuoittuid, muitala Ávvira váldodoaimmaheaddji Kari Lisbeth Hermansen.

 

Doaluiguin gudnejahttit lohkkiid

– Vuosttaš jahkebeali 2008:s ilmmai Ávvir golmma geardde vahkkus.  Easkka borgemánu 12. beaivvi 2008:s nammasuvvui beaivválaš sámegiel aviisa, ja Ávvir ilbmagođii viđa geardde vahkkus.  Danne leat ge mii mearridan borgemánu 2018 daid stuora ávvudoaluid doallat.  Mii áigut ávvujagi doaluiguin gudnejahttit din, min lohkkiid, ja lohpidit dál juo ahte borgemánu de bovdejuvvobehtet dii ávvudoaluide, lohkaba Ávvira váldodoaimmaheaddji ja neahttadoaimmaheaddji Berit Marie Lise Eira, geat eaba vuos muital juste makkár doaluin lea sáhka.

 

Ođasmahttán neahttasiiddu

Logi jagi ávvudeami oktavuođas leat mii maid ođasmahttán iežamet neahttaaviissa.

– 2015:s fállagođiimet ođđasiid beaivválaččat neahtas, ja dan rájes eat leat ođasmahttán min neahttasiiddu. Dán golmma jagis leat olu oahppan ja oaidnán dárbbu ođasmahttit siiddu fas. Ođđa siidu lea buorebut heivehuvvon mátketelefuvnnaide, man bokte olusat lohket ođđasiid ja galgá addit buoret lohkanvásáhusa buot lohkkiide, muitala neahttadoaimmaheaddji Berit Marie Lise Eira.

Lea miellagiddevaš oaidnit mo lohkkit vuostái váldet ođđa siiddu.

– Mii háliidat áinnas gullat makkárin lohkkit vásihit ođđa siiddu go de almmuhat dan odne, lohká Eira.

 

Ođđa fálaldat

Logi jagi ávvudeami oktavuođas eat ođasmahte dušše neahttasiiddu. Dohko ihtá maid ođđa fálaldat, namalassii digitála vuorká gos leat ovddeš sámi aviissat.

– Otná rájes leat vuorkkás buot Áššu ja buot Min Áigi áviissat. Dasa lassin galget maid buot Sámi Áigi aviissat biddjot vuorkái guovvamánus, muitala Ávvira doaibmaossodaga jođiheaddji Per Christian Biti. 

På forsiden nå