Irggi bovren­mašiinnain hutkkai giessan­goanstta

Leavnnja-nieida galggai riessut ollu liinniid stuora doaluide dán jagi, ja fuobmái goanstta vai álkit šaddá giessan.

14:49 Geassemánu 07. beaivi 2017

Ann-Helen Guttorm Johansen, gii orru Leavnnjas, láve hui ollu duddjot.

Dán vuoro galggai riessagoahtit ollu liinniid, go leat máŋga stuora doalu dán jagi masa duddjo čiŋaid.

– Mun jurddašin, dat ii leat duohta, ahte ii gávdno álkit vuohki riessut liinniid, muitala Ann-Helen, gii lea bovrii bidjan garra báberkartoŋga gitta, mii jorrá ja giessá riesaldagaid.

 

Irgi váillahišgoahtán iežas mašiinna

Bovrenmašiinna luoikkahii iežas irggis mannan čavčča, maŋŋel go fuomášii ahte dan mašiinna sáhttá geavahit duddjomii.

Dál lea máŋggaid liinniide giessan riesaldagaid, ja Ann-Helen irgi lea álgán váillahišgoahtit iežas bovrenmašiinna.

– Son lea áitán ahte dál ferten iežan mašiinna oastit, boagusta Ann-Helen, ja muitala ahte livčče vuogas dakkár mašiidna mas sáhttá mearridit juste man jođánit galgá jorrat, go giessá.

 

Ii mana šat nu ollu áigi

Giessan lea áddjás bargu, ii ge dat buot suohttaseamos oassi liidneriessumis.

– Giessamii manná unnit áigi dál, ja lea buorre jus earáide lea tipsan movt sáhttá dahkat vai šaddá álkibun, lohká duojár ja mieđiha ahte lea lossat gieđaide go giessá daid riesaldagaid mašiinna haga.

Ann Helen Guttorm Johansen almmuhii filmmaža sosiála mediain, Facebook joavkkus gos digaštallet duddjomiid.

Ávvir lea ožžon lobi almmuhit dan filmmaža mas oaidná movt hutkkus lea.

Fáddásánit
Magasiidna

På forsiden nå