Preassagovat: Børning 2

Biilavuodjin, humora ja mielahisvuohta harmoniijas

Børning 2 lea filbma mas lea olu leaktu ja mii doallá dan maid lohpida, muhto lea ávki jus guođát árvvoštallanáiccu ruoktot, nu čállá min árvvoštalli dán ođđa filmma birra.

15:34 Golggotmánu 21. beaivi 2016
Ođastuvvon: 21.10.2016 - 15:39

Børning 2

Norgga action/komediija

Neavttárat: Anders Baasmo Christiansen, Henrik Mestad, Robert Skjærstad, Fredrik Skogsrud, Ravdeep Singh Bajwa, Otto Jespersen, Mikkel Gaup, Kristo Salminen, Lise Karlsnes, Vegar Hoel, Arthur Berning, Ida Husøy, Mats Mogeland, Frode Haarstad, Sven Nordin, Anders Rydning, Jade Francis Haj, Geir Schau, Stig Frode Henriksen, Marie Blokhus, Lisa Uhlen Ryssevik, Tori-Lena Eikanger, Jonas Hoff Oftebro, Jenny Skavlan, Simon Norrthon, Emil Lystvedt Berntsen, Thomas Ryste

Regiija: Hallvard Bræin

Giehtačálus: Linn-Jeanethe Kyed, Anne Elvedal

1 diimmu 38 minuvtta

Árvvoštalli: Nils Gjerstad

Árvosátni: 4

Biilafilmmat lea bivnnuhat dán áigge. Jurddaš beare Fast&Furious-ráiddu erenoamáš lihkostuvvama. Børning-filmmat vižžet olu inspirašuvnna dáin, muhto maiddái klassihkkáriin nu mo «Verdens sprøeste bilrace» (originalnamma: The Cannonball Run, 1981) ja Flåklypa Grand Prixas (1975).

Børning (2014) filbma muitalii lobihis biilagilvvus mii lei Oslos Nordkáhppii.

Dán vuoro galget ges moadde «rånára» (journ. meark. joavdelas vuodjit) gilvalit Fosnavågas Ruoŧa ja Suoma bokte Murmánskii Ruššii.

 

Álggus oaidnit go Roy Gundersen (Christiansen) beassá giddagasas, gos lea guokte jagi čohkkán.

Olggobealde vuordá bargu márfegiehmánnin bensiidnastašuvnnas. Báikkálaš «rånáriid» searvvis lea son árvvus atnon ja gudnejahtto dego gonagas.

Muhto de bohtet guossit, geat eai leat bovdejuvvon ja geat bilidit feastta ja hástalit Roy gilvvu vuodjit Fosnavågas Sunnmøres gitta Murmánskii Ruššii.

Roy ii hálit lobihuššat das, muhto su 16-jahkásaš nieida Nina (Husøy) ja su mášohis irgi Charlie (Oftebro) searvaba hástalussii ja vuoddjába Fosnavågii.

Dakka maŋis čuovvu Roy, guhte áiggošii hálahit Nina eret gilvvus, ja fargga leat son ja dat eará vuoddjit olles leavttuin manadeamen Ruššii.

Seammás čohkohallá su ovttasássi (Skavlan) ruovttus Oslos, ja lea lahka bártna.

 

Børning 2 filmma dáhpáhusat lea aseheappot go supermodealla mii lea nealgudeamen iežas, muhto ferten mieđihit ahte rešissevra Hallvard Bræin ja manusčállit leat hutkan olu suohttasiid.

Teknihkalaš bealit leat measta seamma alla dásis go Hollywood-filmmat. Regiija lea beaktil ja filbma lea čuhppon nu ahte manná jođánit.

Olmmoš beassá reaškit, leaš dal feargabilleahttavuovdi Kjell «Biggen» Bigset (Ryste) dihte guhte johtilit suhtiha, vai Filip Mørk (Mestad) dihte guhte varra lea filbmahistorjjás dat politiijabálvá mii miellasepmosit vuolgá váralašvuođaide dahje Nybakkena (Jespersen) sarkastalaš dajaldagaid dihte, guhte lea sihke lámis ja doaimmashehttejuvvon maŋŋil go lei lihkohisvuođas vuosttaš filmmas.

 

Seammás leat filmmas scenat main leaikkastallet menddo roavvát.

Vaikke dát galgá leat dušše somá, de lea váttis čaibmat go «rånárat» stohket heakkain Nuortameara alde jiekŋacuvkenfatnasa ovddabealde.

In nagot maid nu ahte in imaš makkár rávis dievdu, geas lea ovttasássi lahka bártna ruovttus, livččii oba árvvoštallan ge hutkat dahkat nu mo dán filmmas? Ii buot karakterain leat čielga motivašuvdna.

Manne sápmelaččat galggašedje gillet veahkehit olbmuid lobiheamet rasttildit ruoššarájá, dat livččii galgat maid buorebut čilgejuvvon.

Mikkel Gaup karakterain ledje maid sáhttit eambbo bargat.

Muhtin karakterat, nu mo politiijabálvá Mørk, livčče heiven buorebut govvaráidofilbmii.

 

Muhto jus eat beroš diekkár «bagateallain» lea dát filbma mas lea leaktu ja mii lea somá, ja mii addá dan maid lohpida.

Muđuid árvádalan ahte olusat ostet billeahta ja ahte moatti jagi geahčen ilbmá vel «Børning 3».

 

 

På forsiden nå