Gottii stuoraha Iešjávrris

Sotnabeaivve iđida gal lei kárášjohkalaččas Hans Jørgen Hauglis albma guollelihkku go gottii dán dápmoha sáimmain. Geahča video!

11:26 Miessemánu 02. beaivi 2016
Ođastuvvon: 20.05.2016 - 09:18

Gásadatvuonas Iešjávrris láve Hans Jørgen Haugli bidjat sáimmaid, sotnabeaivvi lei oahppamin sáimmaid go fidnii badjelaš logikilosaš dápmoha.

– Lei issoras somá ja ollu dovddut, lean lihkolaš go ledjen okto. Smihtten áhči birra, sus lean oahppan juoŋastit ja gullen su muitaleamen oaidnán ja goddán stuorra dápmohiid. In leat gal badjel logikilosaš dápmoha gullan su muitaleamen, ja dál lean hui čeavlái, lohká Haugli.

(Ášši joatká gova vuolábealde)


RÁMIS: Kárášjohkalaš Hans Jørgen Haugli čájeha dápmoha man fidnii sáimmain Gásadatvuonas Iešjávrris mannan sotnabeaivve. – Dál de lean rámis, mojohala guollebivdi duđavaččat. Čájehuvvui ahte dápmot lei gođđoguolli ja lei borran njágáža. Dápmot lei buoidi ja fiinnis.
Govven: Inga Marie Guttorm

Ii leat gullan nie stuorra guoli goddon

Haugli ii loga goassege gullan ii ge oaidnán nu stuorra dápmoha, nu lei dieđusge rámis logikilosaš dápmohiin man fidnii sotnabeaivvi. Dápmot, man Hans Jørgen Haugli gottii, dettii 10,2 kilo ja guhkkodat lei 95 sentte, iige loga dápmoha vánahan go mihtidii dan.

Finnmárkkuopmodaga meahcceossodaga jođiheaddji Einar Johannes Asbjørnsen lohká lea hui  hárve go nu stuorra dápmoha fidne Iešjávrris, muhto lohká dat lea stuorra jávrri ja vejolašvuođat dieđusge leat.
– Lean gullan muitalusaid doložis ahte godde stuorra dápmohiid Iešjávrris, muhto dieđusge dat ii leat dábálaš, muhto seammás ii leat veadjemeahttun, ja dan son duođašta dápmohiin, lohká Asbjørnsen. 

 

Stuorámus man sáhttá fidnet
Einar Johannes Asbjørnsen čilge go dápmot šaddá dan mađe stuorisin, de borrá eará guliid. Mjøsas, gos Asbjørnsen lea bajásšaddan, leat ollu dápmoha,  ja lohká logikilosaš dápmot lea várra stuorámus man sáhttá fidnet. 
– Lea bures dahkkon go lea fidnen dan, ahte ii leat gaikkodan fierpmi. Logikilosaš dápmot lea stuorra guolli, assás cuohppa, ja jáhkán lea dat stuorámus man sáhttá oažžut gos dal de oaggu Norggas. Son galgá buriin mielain leat rámis ja čeavlái dál, loahpaha Finnmárkkuopmodaga meahcceossodaga jođiheaddji.

På forsiden nå