Ná lea oaidnit Ánde Somby LP-skearru olggeš. Govven: A.K. Dolven

Imašlaš huikimat, muhto dat ge geasuhii

 Sániiguin «buorre», «wow» dahje «heitot» dán oktavuođas ii orro heivvolaš govahallat Ánde Somby skearru. Loga galle čuoggá Ávvira journalista attášii dasa:

10:44 Skábmamánu 12. beaivi 2015
Ođastuvvon: 12.11.2015 - 15:04

Juoiddá joavddan

Artista: Ánde Somby

Bádden, hábmen ja loahpabarguid dagai Chris Watson, Londonis. 

Lean guldalan buot 4 lávlaga. Oktiibuot sullii 34 minuhta. Čađat guldalin. In leat njuiken numo olmmoš dábálaččat dahká go ohcá buoret bihtá.

 

Gufihtar vuolgá mátkái

LP-skearrus leat 4 bihtá: «Gufihttar», «Gádni», «Neahkkameahttun» ja «Gumpe». Buot 4 bihtá leat dego okta máinnas man ieš goit dulkon ná: “Gufihtar vuolgá mátkái meahccái”.

Dat gufihtar ii oro áibbas dábálaš. Juste dát gufihtar gal orru viehka huikás gufihtar.

 

Gulahallat eatnamiin

«Dát huiká juohke ládje, dat huiká dego meahcis vánddarda, dát huiká dego áigu gulahallat eatnamiin dahje soaitá leat gean nu ozus.»

Sergey Gavrilov

Go guldalin «Juoiddá Joavdan» LP-skearru, de bođii oaivái govva ahte dát gufihtar mii lea vuolgán mátkái, áigu maid gusto juoga dadjat dan máilbmái, nu mo sii geat vihket Parisii čalmmustahttit dálkkádatrievdamiid. Iige soaitte leat leat soaittáhagas maŋimuš bihtás namma “Gumpe”, gean vuostá gufihtar doarru dahje humada.

 

Lottiid jienat ja jaskesvuohta leaba su čuojahanjoavku

LP-skearru bihtáin eai geavahuvvo čuojanasat. Muhto dat dattege ii váikkut man ge ládje LP-skearru kvalitehtii. Áidna čuojanasat mat leat skearrus leat lottiid jienat, gufihttara huikimat, jaskesbottut ja bajánjienat. Dát ledje hui fiidnát heivehuvvon oktii.

 

Juoigalas ja huikái oktanaga

«Gumpe» bihttá lea várra áidna oassi dán LP-skearrus mas guldaleaddji gávdná juoiganmálle mii lea oahpis bealljái. Dakkár juoiganmálle mii muhtumin gullo lávdis dahje radios, dahje eará skearruin.»

 

Vaikko dat «Gumpe» bihttá lea 17.43 minuhtta guhki ja deavdá olles nuppi siiddu LP-skearrus, de ii gullo oahpes juoiganmálle eambbo go 5 minuvtta sullii. Dát juoiggus, juoigan ealáskahtii gufihttara mátkki. Danne go dassážii gufihtar lei ozus gean nu eará buot golbma bihtás. Easka goalmmát bihtá loahpas gullogoahtá gumppe. Maŋimuš bihtás gullo vuos juoigalas gufihttar gii čohkkedii vuoiŋŋastit. Dán bottu go čohkkedii de gullui dábálaš juoiggus mas eai lean dajaldagat, dahje goit daid lei váttis fuomášit dán juoigamis….

 

«Gumpe» lea dat bihttá mas gufihtar čájehii iežas iešvuođaid. Dat lei juoigalas ja seammás huikái. Huikái dassážii go nohke fámut ja ii boahtan gumpe…. Gumppe jienat gullojedje bihtá álggus. Gumppe jienain bihttá loahpahuvvui.

 

Muhto Ánde ii suhtá

«Dát LP-skearru oba sihkkarit ii leat mihkkige feastamusihkais. Lea dakkár skearru mii heive dutnje gii áiggut vuoiŋŋastit ja leat oanehaččat ruovttus, áibbas akto. Dakkár dilis go áiggut bisánit oanehis áigái smiehtastit man nu birra vuđolaččat, geahččalit leat jurddašeaddji, de dalle dán skearru heivešii bidjat čuodjat. Dalle ge dagašit iežat dulkojumiid Ánde Somby LP-skearru birra.»

 

In námut buoremus bihtá dan áidna sivas go buot njealje gullet oktii. Muhto dat guhkemus bihttá mii váldá olles nuppi siiddu lea veahá ealáskahtime dahje baicce lasiheamen muđui skearrui ja skearru muitalussii. Juoiggus maŋimuš bihtás lei buorre. Huikimat skearus ledje buorit ja lottiid jienat maid. Ieš alddis skearru jurdda dahje konseapta lea buorre. Liikon go lea LP-hámis. Liikon go covergovva heive bures skearru sisdollui. Liikon mo ledje hábmejuvvon oktii buot jienat LP-skearrus.

 

«In liiko go 3 bihtá orrot ovttageardánat. In liiko go muhtumin menddo ollu huiká. In liiko go gullo unnan juoiggus mii lea oahpis bealljái. Váillahin juoigáma mii lea oahpis. Váillahin veahá leavttu.»

 

In sáhte ge dajdat dat lei «wow», in sáhte ge dadjat dat lei «buorre», in ge sáhte dadjat dat lei «heittot».

Muhto sáhtán dadjat «gal dat dohkke». Danin attán 3,4 čuoggá 6 čuoggás.

Fáddásánit

På forsiden nå