Almmuhus

Almmuhus

Unna teáhteraš stuora Heddas

OHCALEAPMI: «Tjidtjie» bihttá čájeha oasi lullisámi historjjás mii ii dáidde gullon bearehaga, go mánát biddjoje internáhttii oahppat sámi kultuvrra ja giela.  Govva: Erik Børseth

Åarjelhsaemien Teatere lea dáid beivviid Hedda-beivviin Oslos čájeheame bihtá «Tjidtjie»

Published date: 
Gaskavahkku, 13 Geassemánu, 2018 - 09:55
Fáddásánit: 

Åarjelhsaemien teatere produseanta Leammuid Biret Ràvdnà lohká sidjiide stuora gudnin go leat beassan Hedda-beivviide «Tjidtjie» bihtáin.

– Mii leat nu unna teáhteraš. Dát addá midjiide stuora vejolašvuođa čájehit oaivegávpogii ja eará ­teáhteriidda min muitalusaid. Lea maid dakkár fáttás mii lea áigeguovdil ja maid mii háliidit ja dovdat dárbbu čájehit earáide. Lea hui somá ja dehálaš ahte beasaimet vuolgit, dadjá Leammuid Biret Rávdná Ávvirii ja lasiha dát mátki lea dušše nubbi dahje goalm­mát mátki sis Osloi.  

 

Internáhttamáná ohcaleapmi

Go gullá internáhtaid birra, de dávjá smiehttá dáruiduhttinpolitihka. Muhto dát čájálmas čájeha eará ­beali, ahte mánát biddjoje internáhtaide oahppat sáme­vuođa ja sámegiela maŋŋel garra dáruiduhttima. 

Bihttá lea guđajahkásaš nieiddaža birra gii biddjo internáhttii, guhkás eret váhnemiin, guhkás earet ­eatnis, mii lea «tjidtjie» lullisámegillii.

Produseanta čilge dat lea áibbašeami birra ruoktot ja váhnemiidda, muhto maid olmmáivuođa ja oktavuođa birra.

 

Čiegaduvvon historjá

Čájálmasa mánusa leat čállán jearahallamiid vuođul sihke mánáiguin ja váhnemiiguin geat dán vásihedje. 

– Jáhkán mii fertet hupmat dan birra mii ii hubmo­juvvo, ja mii fertet muitalit dan maid leat čiegadan, čállá manusčálli  ja rešissevra Ane Aass preassadieđáhusas.

 

Lulli-sámi juoigi 

«Tjidtjie» lea sis ovttasbargu Rohde Aass produksjoner ja Turnéteatret Trøndelágas.

Lullisámi teáhteris lea fárus juoigi, Charlotta Kappfjell, sii maid lágidit dán bihtá. 

Muđui leat neavttárat ja musihkkár luođubargit. Vuosttaščájalmas lei juo diibmá Olavsfest ­beivviin Troandimis, ja lea maid čájehuvvon kultuvrralaš skuvlaseahka čájalmasmátkkis ja Vinterlys ­doaluin. 

 

Beaivváš maid doppe

Heddabeaivvit lea lávdedáiddafestivála mii dál lágiduvvo nuppes, ja mannan bearjadaga rájes gitta sotnabeaivái (geassemánu 8.-17.b) čájehit 30 iešguđet teáhterásahusa badjel 40 bihtá Oslo lávddiin. «Tjidtjie» lea odne ja ihttin Det Norske Teatret lávddis.

Beaivváš Sámi Našunálateáhter čájeha ges «Áillohaš» bihtá lávvordaga 16.beaivvi seamma lávddis. Sotnabeaivvi juhket vel Heddabálkkášumi. 

På forsiden nå