OĐĐA LÁVDI: Laila Stien ságastallame Rønnaug Ryssdalain Mátta-Várjjaga girjerádjosa ođđa lávddis mii lea ruhtaduvvon arenadoarjagiin. Govven: Sonja Siltala

Huksejit lávddiid ja buoridit stuoluid

Ovddit gaskavahkku almmuhuvvui buorre ođas go čieža fylkagirjerádjosa ožžo 348 000 ruvnno arenaovddideapmái. Muhtin girjerádjosat huksejit lávddiid doarjjaruđain.

12:34 Juovlamánu 06. beaivi 2017

Lea goalmmát geardi go Našunálagirjerájus juolludii dán ruhtadoarjaga. Lea leamaš áibbas dárbbašlaš doarjja ráđđehusa bealis vai nannejit girjerádjosiid gáibádusaid álbmotgirjerájuslága ektui.

 

Doaibma lassánan

Golmma jagis leat 18 girjerádjosa dan 19 girjerádjosis ohcan doarjaga ja ožžon oktiibuot 1 243 000 ruvnno.

– Dát ruhtadoarjja lea ávkin viidáset bargguide mas ráhkadit girjerádjosiid vuogas deaivvadanbáikin gos iešguđet doaimmat lágiduvvojit. Maŋemus jagis lassánii doaibma Finnmárkku girjerádjosiin 70 proseanttain ja doarjja veahkeha min doalahit doaimma ja dási badjin, muitala fylkkagirjerájushoavda Heikki Knutsen preassadieđáhusas.

 

Oasážat miehtá Finnmárkku

Finnmárkkus lea ruhtadoarjja eanemusat geavahuvvon girjerádjosa lanjaid heiveheapmái vai sáhttet lágidemiid ja doaimmaid čađahit. Lávdehuksen, projektor, stuolut, jietnarusttet ja sullasaš ávdnasat maidda juolludedje buot eanemus ruhtadoarjagiid.

Finnmárkku fylkkagirjerájus oaččui maid 226 000 ruvnno lágidit doaluid miehtá fylkka go Finnmárkku internašunála girjjálašvuođafestivála lágiduvvo.

Mihttu lea ahte miehtá Finnmárkku galget olbmot oažžut oasáža girjjálašvuođafestiválas mii lágiduvvo Álttás boahtte jagi golggotmánu 31. beaivvis skábmamánu 3. beaivái, dieđiha Finnmárkku fylkkagielda preassadieđáhusas.

På forsiden nå