BÁLKKAŠUVVOBA: Máret duo, mas Marit Hætta Øverli ja Klemet Anders Buljo ovttasbargaba, oažžuba dán jagáš kulturbálkkašumi Álttá suohkanis. Govven: Oddgeir Isaksen.

20 jagi ovttas­bargu buktá kultur­bálkkašumi

– Máret duo guovttos muitaleaba guldaleddjiide čáppa historjjá iežaska duohta ja ráinnas musihkalaš ovdanbuktimiin, čállá Álttá suohkan ákkastallamis.

10:24 Skábmamánu 23. beaivi 2017
Ođastuvvon: 23.11.2017 - 10:54

Lea Álttá suohkan mii geige bálkkašumi Máret duo jovkui. Joavkkus leaba Marit Hætta Øverli ja Klemet Anders Buljo guovddážis.

– Geasuheaddji akustihkalaš folk-pop šuoŋat čájeha oasážiid dološ sámi jietnageavahanvugiid mat leat bures seaguhuvvon ođđaáigásaš elektrovnnalaš ja silolaš gitárajienaide. Musihkkárat leaba bargan ovttas badjelaš 20 jagi ja almmuheigga skearru «Alo» 2015:s, muitala Álttá suohkan.

Altaposten dat ovddemuš čálii dán birra.

 

Lávlunnásti 70-logus

Marit Hætta Øverli lea geahččaladdan iešguđet šáŋŋeriid ovdal go fuomášii ahte luođis son viežžá eanemus inspirašuvnna.

Son lea mánnán leamaš mielde Máze Nieiddat joavkkus. Lávlon polkaluđiid, mars ja tango, ja gospellávluma. Progressiiva rockejoavku lea čuojahan suinna, popmusihka ovdanbuktán, bargan ovttas Norgga jazzmusihkkáriiguin ja mátkkoštan Amerihkás ja Kanadas.

– Buot dán dagai son ovdal go fuomášii ahte háliidii ieš stivret iežas musihkalaš luotta ja gávdnat dan luotta mas son loaktá buoremusat, čállá suohkan.

 

Nanu komponistaduogáš

Klemet Anders Buljo lea musihkkár ja buvttadeaddji. Son lea čuojahan ja searvan badjel 2000 lávlagii sihke gitárain dahje buvttadeaddjin.

Son lea komponeren lávlagiid Norgga Opera, Lillehammer OG, Beaivváš Sámi Našunálateáhtera ja Deanu kulturskuvlla ovddas.

– Son lea ollu sámi artisttaide leamaš musihkalaš jođiheaddjin ja jođihan orkeastariid, čállá Álttá suohkan ákkastallamis.

 

Ávvueahket Álttá museas

Bálkkašupmi geigejuvvo juovlamánu viđat beaivvi eahkedis, Álttá museas, ja vuoitit oažžuba 15 000 ruvnno ja dáidaga.

Seamma eahkeda geige suohkan maid Kulturstipeandda Kristoffer Karjalainenii, ja áŋggirdeaddjebálkkašumi Henriette Bismo Eilertsenii.

På forsiden nå