OAČČUI BÁLKKAŠUMI: Dáiddár Britta Marakatt-Labba oaččui John Savio-bálkkašumi. Govven: Andreas Wälitalo/Norrbottens-Kuriren

Oažžu 2017 John Savio-bálkkašumi

Dáiddár Britta Marakatt-Labba oažžu dán jagáš John Savio-bálkkašumi.

15:51 Borgemánu 29. beaivi 2017
Ođastuvvon: 30.08.2017 - 08:47

Jurys ledje dáiddárat Lena Stenberg ja Joar Nango, ja vel Davvi-Norgga Dáiddamusea konserváhtor Charis Gullickson.

John Savio-bálkkašupmi:

Bildende Kunstneres Hjelpefond, ovttasráđiid Sámi Dáiddárservviin ja Davvi-Norgga Dáiddamuseain dat geigejit dán bálkkašumi.

 

John Savio-bálkkašupmi geigejuvvo dakkár dáiddárii geas lea sámi duogáš ja identitehta, ja guhte lea erenoamáš oidnosis leamaš Norgga dáiddasuorggis, juogo prošeavttaid bokte, mat leat oidnosis leamaš dálá áiggis, dahje iežas obbalaš dáiddárvuođa bokte.

 

Bálkkašupmi juhkko juohke nuppi jagi, vuosttaš geardde 2015:s, dalle geigejuvvui Geir Tore Holmii.

Iežaset čilgehusas deattuha jury ahte Britta Marakatt-Labba lea leamaš dehálaš olmmoš Sámi, Norgga ja Ruoŧa dáiddamáilmmis olu jagiid.

– Son lei oassin Máze-joavkkus 1970-logus, mii lei dehálaš sámi kultur-, dáidda- ja identitehtalihkadus. Marakatt-Labba lea leamaš ja lea ain pioneara guhte gállá ođđa luottaid eará sámi dáiddáriidda, ákkastallá jury preassadieđáhusas.

 

Searvvai Documenta14:s

Muitaleapmi lea váikkuhan Marakatt-Labba dáidaga motiivaválljejumiide ja govaide.

Dán jagi searvvai son dovddus Documenta 14 kulturriemuide Kasselis, Duiskkas, «Historjá» govain, mii leat 24 mehtera govdosaš sákkaldatgovva sámi historjjá birra.

Dáidaga dábálaččat beassá oaidnit Romssa universitehteas.

 


HISTORJÁ: Britta Marakatt-Labba dovddus govva «Historjá» heaŋgá Romssa universitehtas. Govven: Ola Röe

– Erenoamáš gudni

– John Savio lei sámi govvadáidaga ovdavázziid searvvis, ja danne dovdo erenoamáš gudnin oažžut dán bálkkašumi, lohká Britta Marakatt-Labba.

Garra barggu bokte lea sámi govvadáidda ovdánan rivttes guvlui Davviriikkain, oaivvilda son.

– Dat ii leat nuvttá boahtán, muhto lea gáibidan garra barggu ja jáhku dasa mainna olmmoš bargá, lohká son.

Vuoiti oažžu 150 000 ruvnno Bildende Kunstneres Hjelpefondas.

 

Bálkkašupmi geigejuvvo Davvi-Norgga Dáiddamuseas Romssas, čakčamánu 21. beaivvi diibmu 19:00. Marakatt-Labba dáidagat čájehuvvojit seamma museas golggotmánu 21. beaivvi rájes.

Fáddásánit
Kultuvra

På forsiden nå