Ánnámáret Ensemble lea ráhkadeamen musihkkavideo «Sálbma» nammasaš bihttái, ja sávvá olmmošveaga searvat fárrui filbmii man Katja Gauriloff ráhkada boahtte vahkkoloahpa. Govven: Studio Artica Karoliina Juhola

Bovde searvat musihkkavideoi

Ánnámáret Ensemble lávlu Anna Näkkäläjärvi-Länsman lea ovttas Katja Gauriloffain plánen musihkkavideo dahkat, ja dál bovdeba olbmuid mielde musihkkavideoi Facebook bokte.

08:30 Borgemánu 09. beaivi 2017
Ođastuvvon: 09.08.2017 - 10:35

– Mun sávan ahte ollu olbmot bohtet. Nuorat, rávesolbmot, boaresolbmot, mánát, nissonat, dievddut. Dieđusge maid buot etnisitehtat ahte sápmelaččat, suopmelaččat, norgalaččat, geat beare, muitala Anna Näkkäläjärvi-Länsman preassadieđáhusas.
Musihkkavideo govvemat leat sotnabeaivvi borgemánu 13. beaivvi, Stuorrageađgeváris Njuorggámis, Buolbmátjávrregeainnu guoras.

 

Ovttasbargu buollái festiválas
Näkkäläjärvi-Länsman muitala musihkkavideoprošeavtta vuolgán johtui go son oahpásmuvai Katja Gauriloffain diibmá Ijahis ijas, go Ánnámáret Ensemble skearru, «Gollehelmmot», almmustuvai.
– Gauriloff lei guldaleamen min almmustahttinkonseartta. De čuojahin sutnje min skearru ja jerren sus, ahte livččii go doppe okta ge dakkár lávlla mii buvttášii sutnje jurdagiid. Juste dan perspektiivvas, ahte jos ráhkadivččii musihkkavideo, jos son vuolggášii bagadallin. Son guldalii dan skearru ja logai ahte dat Sálbma-bihttá lea su mielas hui fiinnis, ahte son gal hui mielas vuolggášii mielde ráhkadit dan video, muitala Ánnámáret Ensemble lávlu.

 

Teaksta govvida oktavuođa
Katja Gauriloff lea musihkkavideo giehtačálli, ja leage giehtačállán dasa máŋggalágán earálágan elemeanttaid.
– Okta lea dakkár masa mii dárbbašit ollu olbmuid mielde. Dat lea namalassii dan dihte go dat lávlaga teaksta govvida oktavuođa, mii mis lea riikkarájáid rastá sámiin. Ja ahte mii sáhtášeimmet ovttas bargat, ahte mii nanusmuvvat ja min kultuvra seailu nanusin maiddái boahttevuhtii. Dan govvida filmmas dat go mis leat ollu earálágán olbmot das mielde, čilge Näkkäläjärvi-Länsman.

 

Sávvá olmmošveaga boahtit filbmemii
Näkkäläjärvi-Länsman oaivvilda ahte lea stuorra hástalus oažžut olu olbmuid dohko filbmenbáikái.
– Ferten eaktodáhtolaččaid dáhttut, go ii leat dakkár smávva dáiddaprošeavttas nu olu ruhta. Muhto mun sávan mun gávnnan dan veaga dohko, vai mii beassat ollašuhttit dan Katja fiinna idea, muitala Näkkäläjärvi-Länsman.

 

Čiekŋalut mearkkašupmi
Anna Näkkäläjärvi-Länsman oaivvilda ahte lea stuorra mearkkašupmi oažžut oidnosii iežas musihka dán video bokte. Son oaidná video maiddái dáiddalaš prošeaktan.
– Dat lea nu fiidnát giehtačállojuvvon, de das šaddá nu go dakkár unna ealligovva. Dat ii leat dušše musihkkavideo, muhto das lea dakkár čiekŋalut mearkkašupmi. Ahte dan láhkái das leat máŋggalágán ulbmilat, lohká son.

 

– Lea fiinna ášši go beasan buktit iežan musihka dan bokte oidnosii, muhto vel eambbo fiinnis go mii oažžut ráhkadit fiinna ealligova ovttas Katja Gauriloffain. Ja ollašuhttit su idea mii lea hui fiinnis. Ja vel dakkár mii buktá olu olbmuid oktii ja bidjá min smiehttat dan min boahttevuođa ja mo mii galgat dán áiggis bargat vai mii ceavzit. Mu mielas dat lea buot deháleamos sisdoallu mii das lea, loahpaha Näkkäläjärvi-Länsman preassadieđáhusas.

 

Gula «Sálbma» lávlaga dás masa Katja Gauriloff ja Ánnámáret Ensemble ráhkadeaba musihkkavideo boahtte vahkkoloahpa.

Fáddásánit
Kultuvra

På forsiden nå