LUSTAŠLOAHTAS: Beaivváš Sámi Našunálateáhter čájeha “Ritn´oaivi ja nieguid oaidni” čájálmasas man Nils Aslak Valkeapää lea čállán. Govvejeaddji lea Marit Anna Evanger.

Čájehit «Ritn´oaivi ja nieguid oaidni» skeaŋkan gonagaspárrii

Beaivváš Sámi Našunálateáhter oktan eará našunála kulturásahusaiguin Norggas skeŋkejit ovttas erenoamáš skeaŋkka gonagaspára 80 jagi beaivái. Sii guoimmuhit olles geasi Oscarshallen lustašloahtas ja čájálmasat leat rabas olbmuide.

13:31 Miessemánu 10. beaivi 2017

Norgga gonagaspára 80 jagi beaivvi oktavuođas addet kultur-Norgga ásahusat ovttas erenoamáš ja áidna skeaŋkka sudnuide.

 

• Den Norske Opera & Ballett, Det Norske Teatret, Riksteatret, Den Nationale Scene, Nationaltheatret, Oslo Filharmoniske, Bergen Filharmoniske OrkesterOrkester ja Beaivváš Sámi Našunálateáhter geat ovttasráđiid guoimmuhit olbmuid dán geasi kulturšloahtas Oscarshallenis.

 – Lea golbma čájálmasa. Okta čájálmas lea áibbas ođas ja guokte mat leat ovdal čájehuvvon. Čájálmasat leat sihke rávisolbmuide ja mánáide. Das maŋŋá dollejit neavttárat davás ja johtet báikkis báikái dainna Johan Turi čájálmasain, lohká Beaivváš Sámi Našunálateáhtera preassagulahallanolmmoš Brita Triumf ja lohká son ii sáhte almmuhit makkár bihtát dat leat vuos.

Beaivváš Sámi Našunálateáhter galgá čájehit oasi “Ritn´oaivi ja nieguid oaidni” čájálmasas Oscarshallas čakčamánu 9. beaivvi. Dasa lassin čájehuvvojit guokte čájálmasa mánáide, čakčamánu 8. beaivvi.

 

Sámi kulturvásáhusat oaivegávpogis

Beaivváš Sámi Našunálateáhtera preassagulahallan olmmoš Brita Triumf muitala leat vuos duot eará našunála kulturásahusat main leat čájálmasat, sihke teáhter ja musihkka. Čakčamánu álggus, go Beaivváš Sámi Našunálateáhter lea Oslos, Johan Turi čájálmasain, de fitnet Oscarshallenis guoimmuheamen gehččiid viđa geardde.

 Plána mielde galget dát našunála kulturásahusat guoimmuhit olbmuid dánssain, musihkain ja teáhteriin lustašloahtas ja galgá leat vejolašvuohta gávdnat vuogas kulturvásáhusa olles bearrašii. Karius ja Baktus rájes, gitta balehttii, gitta Romeo ja Juliei, filharmoniijas orkeasttar musihkkaeahkedii ja loahpas vásihit sámi kulturvásáhusaid oaivegávpogis.

 

Dušše sadji 70 olbmui

Miessemánu álggus almmuha gonagasviessu guđemuš ásahus guoimmuha maid ja goas Oscarshallenis lustašloahtas. Brita Triumf muitala lea Norgga dronnet Sonja 80 jagi beaivvi oktavuođas ahte Norgga našunála kulturásahusat guoimmuhit iešguđet čájálmasain Oscarshallen kavalérlávddis.

 – Lea rabas olbmuide. Muhto lustašloahtas lea dušše sadji 70 olbmui. Gánnáha várret ja oastit bileahta dál juo jus leat fitnamin Oslos, rávve Brita Triumf.

 Son lohká leat 40 čájálmasa geasi miehtá, miessemánus čakčii. Su dieđuid mielde vuovdigohtet bileahtaid gávccát beaivvi rájes. Muitala 1800-logus huksehii gonagas Oscar lustašloahta Oscarshall. Maŋimuš jagiid leat divvon lustašloahta dološ hápmái ja gonagasviessu háliida ahte lustašloahtta geavahuvvo ulbmila mielde.

På forsiden nå