Mearrasámi nieida Mette Henriette galgá ráhkadit ođđa musihka mii čuojahuvvo Riddus vuohččan boahtte geasi. Govven: Ørjan Bertelsen

Soaittát vajáldahttit gos leat go gulat su musihka Riddus

Musihkkadahkki, jazzmusihkkár ja saksofuvdnačuojaheaddji Mette Henriette ráhkada dán jagáš diŋgojuvvon oasi Riddu Riđđu festiválii.

14:22 Cuoŋománu 06. beaivi 2017
Ođastuvvon: 06.04.2017 - 14:23

Mette Henriette Martedatter Rølvåg gohčoduvvo musihkalaš vávastussan, ja lea buriid árvosániid ožžon Norggas ja olgoriikkas.

– Dá lea min skeaŋka guldaleddjiide dál go ávvudit Sámi ávvujagi. Go dakkár čeahpes ja bivnnuhis nuorra sámi musihkkadahkki go Mette Henriette ráhkada dán jagáš diŋgojuvvon oasi lea hui mávssolaš midjiide, muitala Riddu Riđu festiválajođiheaddji Karoline Trollvik.

(Ášši joatká gova vuolábealde)

Mette Henriette musihkas sáhtát vajáldahttit áiggi ja báikki. Govven: Ørjan Bertelsen

 

Mette Henriette mátkkošta miehtá máilmmi, ja diibmá almmuhii vuosttaš skearru stuora skearrofitnodaga ECM bokte. Ii mannan guhkes áigi ovdal go internašunála beroštumi oaččui. Skearru oaččui buriid sániid, ja kritihkkarat gohčodedje su vávastussan, ja Englándda aviisa The Independent árvvoštalai su skearru leat dán jagáš skearrun («Jazz Record of The Year»). Dagbladet lea maid lohkan ahte Mette Henriette oažžu du vajáldahttit áiggi ja báikki iežas musihkain.

– Su sierralágan vuohki movt lahkona musihka, ja movt son hálddaša boktit miellalági, dahká ahte mun roahkka sáhtán dadjat ahte guldaleaddjit besset vásihit dovddavásihusa Mette Henriette Sámis, loahpaha Trollvik.

Fáddásánit
Kultuvra

På forsiden nå