Dat golbma artista leat ÁGY, Ondt Blod ja DAGNY. Preassagovat. ÁGY preassagova lea Knut Aaserud govven.

Hardcore, pop ja R&B čuodjá Riddu guolbanis

Golbma artista geain lea olles máilbmi vuordimis, leat gergosat lávket Riddu lávdái dán geasi. Buohkat leat Davvi-Norggas eret, ja Riddu Riđu hoavda jáhkká bures duoldat lávddi ovddabealde.

15:41 Njukčamánu 28. beaivi 2017

Sis lea buohkain gullevašvuohta Davvi-Norgii, ja leat dego Davvikalohtta Coctaila geain leat sámi čanastagat ođđamállet vugiin.

 – Dá leat golbma nama iešguđet šáŋŋeris geat leat ollu gullon maŋemus jagi, ja geaid mii jáhkkit, sáhttet olbmuid boktit nu ahte bures duoldá Ridduguolbanis, muitala Riddu festiválahoavda Karoline Trollvik preassadieđáhusas.

 

Čáppa lávlunjietna

Romssa artista DAGNY lea Norgga varraseamos pop-násti. Go almmuhii singela «Backbeat» 2015 čavčča, de guldaluvvui su lávlla badjel ovcci miljovnna geardde Spotifyas daid vuosttaš mánuid, mii doalvvui su «Artist to watch» listui Apple, Spotifyas ja Tidalas. Lávlagat «Backbeat» ja «Fool’s Gold» lea čuojahuvvon ollu, ja musihkkaárvvoštallit lohket su musihka leat energiijalaš synth-pop musihkkan, ja sus lea čáppa lávlunjietna.

 

Magihkalaš miellaláhki

Nubbi násti, ÁGY Ráissas eret, boahtá fas lávdái ođđa musihkalaš hámiin, ja lea johttán R&B gomuvuhtii. ÁGY šattai dovddusin go su lávlla «Arvedávgi» biddjui P3 čuojahanlistui. Dat eai leat beare máŋga sámi artista leamaš dan listtus. Sámi elemeanttat leat mielde go son lávke dan ođđa šáŋŋerii.

 – Lea álo buorre elektrihkalaš miellaláhki Riddu lávddis, ja máŋga jagi lean ieš leamaš geahččin Riddu Riđus ja dál beasan ieš dan lávdái ráhkadit magihkalaš miellalági. Dovddan iežan ruovttus Riddus – gos buohkat leat bures boahtimat, lohká ÁGY ja váimmožat báitet su čalmmiin.

 

Garra ráhkun ja moivi

Hardcorejoavku «Ondt Blod» geat leat Finnmárkkus eret, bohtet maid garrasorttat musihka čuojahit. Sii leat buriid árvvoštallamiid ožžon «Finnmark» skearru ovddas, ja leat bajimusas Norgga hardcore musihkkahámis.

Sii leat čuojahuvvon ollu P3 listtus, ja beaggá ahte cuvkejit lávddi musihkain.

 – Mii nahkehit Ivgu gávtti, ja coggalit máŋga ođđa lávlaga sehkkii go vuolgit Riddui. Mii lohpidit garra gitárajienaid, davvinorgalaš ráhkuma, moivvi ja hávskivuođa Riddu guolbanis.

 

Ovdalaččas lea Angel Haze almmuhuvvon artista Riddus dán geasi, suoidnemánu 12.-16.beivviid.

Fáddásánit
Kultuvra

På forsiden nå