Almmuhus

Almmuhus

Politihkalaš dáidagiin devdet Romssa gávpoga ja čalmmustahttet dikki

ČALMMUSTAHTII: Dáid bohccooivviiguin čalmmustahtii Pile o`Sápmi álggaheaddji Máret Anne Sara, vieljas Jovsset Ante Sara vuoigatvuođadikki olggobeale Sis-Finnmárkku diggegotti diibmá. Dál áigot eará dáidagiiguin čuovvolit Romssas go Hålogalándda Lágamánneriekti galgá meannudit guoddalandikki dán mánu loahpas. Preassagovva: Iris Egilsdatter/Pile o´Sápm

Pile o´Sápmi álggaha čuođi jagi ávvudeami garra manifestašuvnnaiguin Romssas, seammás go Jovsset Ante Sara deaivvada fas stádain dikkis

Dan botta go nuorra boazodoalli Jovsset Ante Sara (24) fas čohkká diggesálas dikkis stáhta vuostá iežas vuoigatvuođaid alde, de deavdá su oabbá, Máret Anne Sara, Romssa viiddis dáiddaprográmmain.

Okta Pile o´Sápmi buktagiin lea čájáhus «Sápmi 1970-2017 – Ladju manifestašuvnnat» man Arvid Sveen, Hans Normann Dahl, Máret Anne Sara, Hans Ragnar Mathisen ja Anders Sunna leat ráhkadan, čállá Pile o´Sápmi preassadieđáhusastis. 

 

Ladju manifestašuvnnat
«Ladju manifestašuvnnat» -čájáhus lea laju birra, sihke hábmenávdnasa dáfus, muhto maiddái dan lossa dieđu birra mii čájáhusa duohken lea.

Čájáhusas leat liántatevnnegat, ja dálááiggemanifestašuvnnat iešguđet dáiddáriin, iešguđet jahkelogežiin, iešguđet geográfalaš lahkoneamis ja iešguđet vuolggasajis.

Dáidagat leat válljejuvvon čájáhussii go dain leat mearkkašahtti seammalágan fáttát ja ovdanbuktojit oalle seamma ládje, vaikke buot dáidagat leat ráhkaduvvon iešheanalaččat ja 40 jagi áigodagas. 

Dát erenoamáš čájáhus čájeha garra rahčamuša Sámis.

– Maid dát oasáš muitalusain muitala servodaga ja vuoigatvuođaid ovdáneami birra, jearrá Máret Anne Sara preassadieđáhusas.

 

Biškkas ja ledjon
Pile o´Sápmi dáiddár, kurator ja prošeaktajođiheaddji, Máret Anne Sara, čájeha iežas dáidagiid ovttas Arvid Sveenain, Hans Normann Dahlain, Hans Ragnar Mathiseniin ja Anders Sunnain.

Čájáhus čájeha earret eará sámi biškasa 1981:s ja 2013:s, ja čájeha soađi mii lea bistán badjel 40 jagi fámolaš stáhtaledjona ja Sámi eatnamiid industrialiserema vuostá.

– Mun duššástuvven go 2015:s soaittáhagas fuomášin Arvid Sveen govaid. Govain maid ieš ráhkadin 2013 «Oaivemozit/Galskap/Madness» čájáhussii, lei seamma fáddá go dain maid Arvid Sveen ráhkadii 1970-logus. Dát dagahii ahte vuodjudin iežan sámi dáidagii, mii fas mielddisbuvttii Pile o`Sápmi ja nu maiddái dán čájáhusa, lohká Sara.

 

Vuoigatvuođadiggi rahpá sámi ávvujagi
Pile o´Sapmi čalmmustahttá sámi vuoigatvuođaid dainna go deavdá gávpoga politihkalaš dáidagiin.

Sii háliidit ovddidit digaštallama sihke politihka birra ja dakkár proseassaid birra mat leat dagahan ahte sámi vuoigatvuođat dán áigge leat nu garrasit áitojuvvon stáhta politihka bokte.

Vahkku guhkkosaš dáiddaprográmma, man Máret Anne Sara lágida ovttasbarggus Small Projects Galleryin, dáhpáhuvvá oktanis go su viellja, Jovsset Ante Sara, nuppes deaivvada Norgga stádain dikkis.

Sara lea stevdnen stáda njuovvangáibádusa geažil man mielde galggašii geahpedit ealu 75 heggii. Son vuittii dikki Sis-Finnmárkku diggegottis, gos celke ahte ná vuollegis boazologuin koŋkána.

Pile o´Sápmi oaivvilda ahte go stáhta bágge boazodolliid koŋkáneapmái, de bágge stáhta maiddái sámi boazodolliid eret iežaset árbevirolaš kulturealáhusas ja kultuvrralaš vuoigatvuođain.

Nu álggaha prinsihpalaš vuoigatvuođarahčan sámi ávvujagi Romssas, gos diggi lea ođđajagimánu 24.-26. beaivvi.

– Mii čuovvolat dáiddaprográmmain olles diggevahkku, dainna ulbmiliin ahte čájehit duohta gova sámi árgabeaivvis ja sámi vuoigatvuođadilis 100 jagi maŋŋil go politihkalaš bargu álggahuvvui, lohket Máret Anne Sara, Jovsset Ante Sara ja Pile o´Sápmi dáiddárat.

 

Loga maid: 200 bohccooivviin čalmmustahttá vieljas dili

 

Geriljateáhter, street art ja musihkkaalmmuheapmi
Ladju manifestašuvnnat lea dušše oassi Pile o´Sápmi viiddis prográmmas ja vaikke eará osiin ii leat seamma bajilčála, de dain lea seamma deaddu.

Pile o´Sápmi prográmmas leat čájáhusat máŋgga galleriijas, máŋga konseartaeahkeda, street art, performance, geriljateáhter, filbmaprográmma, dáiddáriiguin ságastallamat ja eksklusiiva dáidagiid juohkin.

Anders Sunna, Linda Zina Aslaksen, Anitta Suikkari, Elle Marja Eira, Ivvár, Max Mackhé, Máret Anne Sara, Niillas Somby, Matti Aikio, Suohpanterror, Mai-Lis Eira, Inga Marja Sarre, Anja Saiva Bongo Bjørnstad, Ronja Kathrin Larsen, Hans Ragnar Mathisen ja Viktor Pedersen leat dušše muhtimat dain namain mat ihtet juogo lávddiid dahje almmolaš gávpotlatnjii dien vahkku. 

– Jus leaččat Romsii TIFF oktavuođas, de juolut áinnas orrut vel vahkku, čállá Pile o´Sápmi, man prográmma álgá ge vahkku maŋŋil TIFF.

På forsiden nå