DOHKKETMEAHTTUN BARGODILIS: Maŋimuš jagi lea Beaivváš Sámi Našunálateáhter ožžon máŋga dehálaš bálkkašumi iežaset bihtá «Vidas Extremas» ovddas, man ráhkadedje visttis mii lea nu gollan ahte sáhttá vaikke goas giddejuvvot. Vuorkágovva: Eivor Eriksen

Sádden rabas reivve kultur­ministarii

Beaivváš Sámi Našunálateáhtera ođđa stivra lea sádden rabas reivve kulturministarii Linda Hofstad Hellelandii ja sámediggepresidentii Aili Keskitaloi, mas ávžžuhit riika eiseválddiid ja Sámedikki álgit meannudišgoahtit dan dohkketmeahttun, heajos ja várálaš bargodili mas teáhtera bargit fertejit bargat.

15:48 Golggotmánu 18. beaivi 2016
Ođastuvvon: 18.10.2016 - 15:52

Dás beasat lohkat rabas reivve maid Sámi Beaivváš Našunálateáhtera stivra lea sádden Norgga kulturministarii Linda Hofstad Hellelandii ja sámediggepresidentii Aili Keskitaloi.

Reivve lea maid sáddejuvvon Romssa ja Finnmárkku stuorradiggeáirasiidda, golbma davimus fylkkagielddaide, sámeáššiid stádačállái Anne Karin Ollii ja Stuorradikke kulturlávdegoddái.

 

«Beaivváš Sámi Našunálateáhtera ođđa stivra ávžžuha dákko bokte riika eiseválddiid ja Sámedikki álgit meannudišgoahtit dan dohkketmeahttun, heajos ja várálaš bargodili mas teáhtera bargit fertejit bargat.

 

Ovddeš stivrrat ja teáhterhoavddat leat selehan logenar jagiid mielde ahte dat vistti gos teáhter lea, lea boaresáigásaš ja eahpevuogálaš. Dat eai leat heivvolaččat teáhterdoaimmaide ja bargobirasdilli lea dohkketmeahttun.

 

Teáhterlávdi ii leat lahka ge dakkár mii heive ođđaáigásaš teáhterdoaimmaide, ja teáhterlávddi ja teknihkalaš ossodaga gaska lea dan mađe guhkes gaskka, mii dagaha lossa bargodili. Našunálateáhter kultur-Norggas ánssášivččii mihá buoret dili, gos galgá ássat, doaibmat ja bargat iežas dáidagiin.

 

Visti leat nu gollan ja seainnit leat nu láktasat, go nu máŋgii lea čáhci golgan sisa, ahte Bargobearráigeahčču lea árvvoštallan giddet visti. Bargit buhcet bargosajis, go vel teáhtergeahččit ge fertejit guođđit čájálmasaid heajos sisáimmu geažil. Viessoeaiggádis ii leat ráđđi divodit visti. Aŋkke lea teáhter vuoitán sihke Hedda-bálkkašumi ja Árvvoštalliid -bálkkašumi dan maŋemuš jagi Vidas Extremas bihtá ovddas.

 

Ođđa teáhtervisti ektui čujuha stivra ahte ođđajagimánu 13. beaivvi 2014, sáddejuvvui ohcan ja govvádus ođđa, govttolaš teáhtervistái Guovdageidnui. Sámediggi lea dorjon prošeavtta. Stáda Kulturdepartemeantta ii leat vel vástidan, fargga golbma jagi maŋŋel, go ohcamuš lea sáddejuvvon.

 

Mii bivdit Kulturministara ja Sámediggepresideantta ovttas guorahallat dili ja ráhkadahttit dássedis plána movt gieđahallat dan áigeguovdilis dili:

1. Dás berre veardádallat doaimmaid movt gieđahallat dan várálaš dili. Dat ferte dáhpáhuvvat johtilit ja maid čađahuvvot almmá ájahallama.

2.Dás ferte ráhkaduvvot oktasaš plána gaskkal stáhta ja Sámedikki movt dat guhkesáigge orrundilli galgá čoavdašuvvot.

3.Ođđa teáhtervisti dili ektui čujuha stivra ahte ođđajagimánu 13. beaivvi 2014, sáddejuvvui ohcan ja govvádus ođđa, govttolaš teáhtervistái Guovdageidnui. Sámediggi lea dorjon prošeavtta. Stáda Kulturdepartemeantta olis ii leat vel vástidan, fargga golbma jagi maŋŋel, go ohcamuš lea sáddejuvvon.

4. Stivra bivdá stáhta ja Sámedikki čađahit vejolašvuođaiskosiid dakkáraš prošektii gos Sámi joatkka- ja boazodoalloskuvla ja teáhter šaddet ovtta dáhki vuollai. Stivra oaivvilda ahte dat čuvge energiija aspeavtta, sihke fágalaččat ja doaimmalaččat. Dasa lassin geahpedit arvat oktasaš goluid. Goappeš bealit leabba ovtta oaivilis čađahit dán oktasašproseassa, jus dat čoavdá huksenproseassa.

 

Norggas leat guokte našunálateáhtera. Goappašagain leat stuora hástalusat mat gusket vistiide. Mii leat ilus go 2017 stádabušeahtta dieđiha doaimmaid dasa movt váidudit dili Nationaltheateris Oslos. Dál lea maiddái áigi geahčadišgoahtit dan duođalaš dili Beaivváš Sámi Našunálateáhteris.»

 

 

Reivve leat vuolláičállán Beaivváš Sámi Našunálateáhtera stivralahtut Lene Hansen (stivrrajođiheaddji), Asta Mitkijá Balto, Inger Elin Kristina Utsi, Lars Magne Andreassen, Marit Karlsen, Stein Are Olsen

ja Olav Johan Eira.

På forsiden nå