Nuorra dáiddáriid ja artisttaid ovdánahttimii bidjet eanet áŋgiruššama boahtte golbma jagi. Čájáhusgovva. Govven: Anne Rasmus.

Riddu Riđđu beassá nannet taleantabarggu vel eanet

– Mii leat hui duhtavaččat ja giitevaččat go leat ožžon sadjái dán doarjaga golmma jagi badjel ovttas Talent Norgiin ja Kulturealáhusvuođđudusain, dadjá Riddu Riđđu festiválajođiheaddji Karoline Trollvik.

16:55 Geassemánu 09. beaivi 2016
Ođastuvvon: 09.06.2016 - 17:01

Talent Norge ja Riddu Riđđu leat dahkán šiehtadusa Riddu Session taleantaoasis mii bisttá golbma jagi. Šiehtadus gullá festivála bargui mas máŋga jagi leat veahkehan nuorra taleanttaid ovdánahttit iešguđet šáŋŋeriin. Davvi-Norgga SeastinBáŋku Kulturealáhusvuođđudus lea mielde nannenbarggus mii galgá almmuhuvvot bearjadaga diibmu 11s Romssa Universitehtas, dieđiha Riddu Riđđu preassadieđáhusas.

 

Illudit searvat ovdánahttimii

– Dat lea miellagiddevaš áŋgiruššan masa mii illudit searvat, muitala Talent Norge beaivválaš jođiheaddji Maria Mediaas Jørstad.

– Prošeavtta bokte «Dán jagáš nuorra dáiddár» lea Riddu systemáhtalaččat jođihan taleantaovdáneami máŋga jagi. Ovttas Kulturealáhusvuođđudusain veahkehit mii dál ovdánahttit taleantavuoruheami nu ahte taleantat geat leat mielde galget oažžut čuovvoleami ja dáiddalaš ovdáneami mentorprográmma bokte mii galgá bistit máŋga jagi, muitala Mediaas.

 

Lagabut milliuvdna golmma jagi badjel

Talent Norge ja Davvi-Norgga SeastinBáŋku leat juolludan 900 000 ruvnno Riddu Riđđu taleanta áŋgiruššamii mii galgá bistit golbma jagi.

– Riddu Session áigu movttiidahttit ovttasbargguid ja nuorra dáiddáriid olahit viidábut sihke našunála ja internašuvnnalaččat, ja mun lean sihkar ahte nuorra ja gelddolaš sámi dáidda oidnogoahtá eanet, dadjá Trollvik.

 

Talent Norge lágádusa eaiggádit Seastinbáŋkuvuođđudus DNB, Vuođđudus Cultiva ja Kulturdepartemeanta Stáda bokte.

Fáddásánit
Kultuvra

På forsiden nå