ÁVVUDEABA: Internašunála Sámi Filbmainstituhta direktevra Anne Lajla Utsi ja Davviriikkaid Ráđi láhttu Torgeir Knag Fylkesnes leaba duđavaččat ráđi mearrádusain. Preassagovva: ISFI

– Odne illudetne

Davviriikkaid Ráđđi ávžžuha Norgga, Suoma ja Ruoŧa ovttas ruhtadit Internašunála Sámi Filbmainstituhta.

14:43 Golggotmánu 29. beaivi 2015

Davviriikkaid Ráđi 67. sešuvdna lea čoahkkimis Islánddas ávžžuhan Norgga, Suoma ja Ruoŧa ráđđehusaid fárrolaga hábmet ekonomalaš ceavzilis modealla Internašunála Sámi Filbmainstituhta (ISFI) hárrái, nu ráđđehusat guhkit áigge badjel gokčet instituhta doaibmagoluid.

 

Ráđi mearrádusat:

Davviriikkaid Ráđđi ávžžuha Davviriikkaid Ministarráđi ekonomalaččat searvat dárbbašlaš doaibmadoarjagiin ISFI:i golbma jagi, dahje dassái go Norgga, Ruoŧa ja Suoma ráđđehusat leat gárve oktasaš doaibmadoarjjaortnega, mii sihkkarastá bistevaš doaibmadoarjaga filbmainstituhttii.

Sii ávžžuhit maiddái álggahit prošeavtta sámegielat mánáidfilmmaid doarjuma ja ovdánahttima várás. Dán bokte galget sámemánát ja -nuorat filbma- ja TV-media bokte oažžut kulturfálaldaga mas lea kvalitehta, ja mii ovddasta sámi kultuvrra ja giela.

 

Duhtavaččat

– Dát lea boađus das go davviriikkalaš ovttasbargu bures doaibmá. Go áŋgirušše sámi filmmaid ovddas, mii lea ovdáneamen olu ođđa nuorra filbmadahkkiiguin, de dat servet ovdánahttimin sámivuođa. Odne lean ilus, dadjá Torgeir Knag Fylkesnes, guhte lea Sosialisttalaš Gurutbellodaga stuorradikkeáirras ja Davviriikkaid Ráđi láhttu.

– Dát lea stuorra dáhpáhus sámi filbmii ja Davviriikkaid Ráđđi lea dán mearrádusain ovddidan Internašunála Sámi Filbmainstituhta oktasaš davviriikkalaš áŋgiruššansuorgin. Midjiide dát lea stuorra vuoitun ja dál mii ávvudat, dadjá Anne Lajla Utsi, filbmainstituhta direktevra.

Fáddásánit
Kultuvra

På forsiden nå