LOHKÁ STUORRA GUDNIN: Elina Waage Mikaelsen mielas lea stuorra gutni nammaduvvot Riddu Riđđu dán jagáš nuorra dáiddárin ja áigu geavahit 25 duhát ruvdnosaš stipeandda iežas dáidaga ja musihka ovddideapmái. Govva: Anne Rasmus

Jagi nuorra dáiddár nammaduvvui

Riddu Riđđu dán jagáš nuorra dáiddárin nammaduvvui 23-jahkásaš Elina Waage Mikaelsen.

19:07 Suoidnemánu 10. beaivi 2015

Mikaelsen lea bajásšaddan Gáivuonas ja orru Tromssas.

 – Lea stuorra gudni nammaduvvot dán jagáš nuorra dáiddárin ja ruhtaskeaŋka mearkkaša ollu munnje, dadjá son maŋŋel presentašuvnna.

 

Addá vejolašvuođa

Riddu Riđđu Festivála addá nuorra sápmelaš dáiddáriidda vejolašvuođa ovdánit sin dáiddalaš čehppodagas ja dahká sin dovddusin riikka siste ja olgoriikkain. Ovttasbargguin SpareBank 1 Nord-Norge Kulturnæringsstiftelsen- kulturealáhusfoanddain juolludit nuorra dáiddárii 25 000 ruvnnu stipeandda. Duopmárat eai lean eahpádusas gii dán jagáš stipeandda ánssáša.

 – Lea hui somá go beasan dáppe čájehit iežan dáidaga ja čuojahit iežan musihkka, muitala son.

 

Lagamus váimmu

Elina Waage Mikalsen vázzá vuosttas jagi Nordland dáidda- ja filbmafágaskuvlla Kabelvågas, ja geahččaladdá dáiddafilmma, skulptuvrraid, sárguma, teavsttaid ja jietna-/videoinstallašuvnnaid. Musihkkan muitala nuorra nieida leat bargan agibeaivvi.

 – Dat lea juoga maid máhtan ja lea lagamus mu váimmu, deattuha son.

 

Sávvá lihkostuvvat

Elina berošta birassuodjaleamis, feminismmas, skuvllas ja das mo lea eallit sápmelažžan Norggas. Son áigu dán jagáš Riddu- dáiddárin erenoamážit fokuseret gillii, dahje gielas gáidamii.

Son sávvá lihkostuvvat bajidit oidnosii justa dan sámi eallinvuogi mii sus lea, ja leahkit olusiid dán áigge nuorra sápmelaččaid ovddasteaddjin.

 – Stipeandda boađan geavahit iežan ovdánahttimii dáidagis ja musihkkas, loahpaha son.

Fáddásánit
Kultuvra

På forsiden nå