Noereh! organisašuvnna stivraláhttu Ulrikka Louise Snowdon lea hui ilus go dušše jagis lea gáktebeaivi šaddan nu dovddusin. Govven: Mattis Ailo Hætta

Gáktebeaivi šaddan dovddusin

Vaikke lea dušše jahki gollan dan rájes go Noereh! organisašuvdna lágidii vuosttaš gáktebeaivvi, de lea beaivi jo oallusiidda šaddan mearkabeaivin.

20:44 Cuoŋománu 10. beaivi 2015
Ođastuvvon: 11.04.2016 - 09:33

 –Mun lean issoras ilus go dušše jagis mii leat olahan nu issoras ollugiid gáktebeivviin, dadjá Noereh! Organisašuvnna stivramiellahttu, Ulrikka Louise Snowdon.

Noereh!

Noereh! lea sámi nuoraidorganisašuvdna Norgga beale Sámis, mii lea bellodatpolitihkalaččat ja eallinoinnolaččat neutrála ja sin searvvis sáhttet buohkat oassálastit. Sin miellahtut leat gaskal 12 ja 30 jagi ja orrot miehtá Norgga.

Noereh! galgá addit oktasaš deaivvadansaji sámenuoraide, ja galgá doaibmat gievrras sámi nuoraidorganisašuvdnan ja sámenuoraid jietnan.

Sii dat álggahedje gáktebeaivvi diibmá.

 

Háliidit gávtti dahkat dovddusin

Cuoŋománu 10. beaivvi diibmá lei ge Noereh! organisašuvdna hástalan buot sápmelaččaid coggat gávtti iežas beaivválaš dilis dainna ulbmilin ahte čájehit iežaset sámi identitehta, ja maid dahkkát dovddusin gávtti beaivválaš gárvun.

Noereh! organisašuvdna lea liikostuvván bures dáinna go odne lei fas gáktebeaivi, ja dalle ledje olusat coggan gávtti.  

 – Dán jagi eai lean nu ollu joatkkaskuvllaoahppit coggan gávtti, muhto mun oidnen iđđes juo ollu nuoraid ja maid rávis olbmuid vázzime gávttiiguin, nu ahte dat goit čájeha ahte mii leat olahan oba olusiid dáinna beivviin, muitala Snowdon.

Ávvir lei maiddái Instagram bokte hástalan lohkkiid juohkit gáktegovaid #ávvirgákti gilkora bokte, dás vuollelis oaidnibehtet oasáža dain: 

 

 

 

Fáddásánit
Kultuvra

På forsiden nå