VUOSTTAŠ SINGEL: Folk-rock joavku Ravggas lea almmuhan musihkkavideo dáid beivviid. Preassagovva.

"In dárbbat appelsiinnaid!"

“In dárbbat appelsiinnaid!” lea namma. Geahča Ravggon joavkku vuosttaš musihkkavideo dás!

18:41 Njukčamánu 10. beaivi 2015
Ođastuvvon: 11.03.2015 - 13:29

 – Dat leat dan birra go giinu boahtá olggobealde deike Sápmái. Eai sii álo oainne visot mii mis lea juo dáppe. Eat mii dárbbat daid appelsiinnaid, go mis leat luopmánat jekkiin ja bohccot duoddariin ja mehciin. Mis eai leat guoros, ávdin eatnamat. Lea eallin doppe meahcis ja duoddaris, ja mii oažžut buot doppe. 

Nu čilge Ravggon joavkku lávlu Milla Elmiina Pulska Vuohčus Suomas Ávvirii, dán iežaset vuosttaš lávlaga birra maid leat almmuhan. Dál lea sin musihkkavideo maid ilbman, man oainnát dás vuollelis.

 

Geat leat ravggon:

Milla Elmiina Pulska - lávlu

Unna-Maari Pulska - keyboards

Matti Naakka - gitára

Panu Klemettilä - percussion

Erno Karjalainen - bássa

SGP-gilvaleaddji

Ravggon joavkkus leaba Milla Elmiina (25) ja su unnaoappáš Unna-Maari (23), ja dát joavku galgá ge dán jagi gilvalit Sámi Grand Prix musihkkagilvvus beassášlávvordaga Guovdageainnus “Máska” nammasaš lávlagiin. Earret Vuohču oappášguovtto, leat sis musihkkárat geat bohtet Oulus.

 

Guovtti joavkkus

Milla lei oappáinis Unnain mielde Sámi Grand Prix -gilvvus jagis 2009 ovttas Somby-joavkkuin. Somby vuittii dalle Sámi Grand Prix -gilvvu. Somby joavku gal doaibmá ain liikká, muitala Milla. 

“In dárbbat appelsiinnaid!” musihkkavideo lea Henry Kestilä govven geasset studios jávregáttis. Milla lea hui duhtavaš ieš. 

 – Juo, mii gal leat hui duhtavačat, go lea vuosttaš single, vuosttaš lávlla man leat almmuhan. Dá lea maid vuosttaš lávlla mii galgá min boahttevaš skerrui man leat álgán báddet ja ráhkadit.

Fáddásánit
Kultuvra
Tags
Ravggon

På forsiden nå