Emma Elliane (16) doallá gieđastis vuosttaš CD-skearru «Dovddut eai gielis» man almmuhii njukčamánu loahpas. Govven:Sergey Gavrilov

Dan nieiddas leat attáldagat!

Emma Elliane Oskal Valkeapää  (16) almmuhii vuosttaš CD-skearru «Dovddut eai gielis» njukčamánu loahpas. Ávvir lea guldalan ja árvvoštallan nuorra artistta CD-skearru.

09:17 Cuoŋománu 08. beaivi 2016
Ođastuvvon: 11.04.2016 - 12:22

«Dovddut eai gielis» CD-skearrus leat gávcci lávlaga. Buot leat sámegillii. DAT lágádus lea almmuheaddji. Norgga Sámediggi lea dorjon ruđalaččat.

Sánit ja šuoŋat Emma Elliane Oskal Valkeapää, buvttadeamis mielde leaba Roger Ludvigsen ja Kjetil Dalland.

CD-skearrus lea vuogas olggoš man siste lea vel unna gihpaš mas leat buot teavsttat sámegillii ja eŋgelasgillii.

 

Stoahká šáŋŋeriiguin

Ieš nuorra artista lohká ahte su váibmomusihkka lea pop-šáŋŋer. Aŋkke dán CD-skearrus leat sihke pop- ja rap-lávlagat ja maiddái luohti. Dát lei beare su hállu geahččaladdat earálágan šáŋŋeriiguin juste dán CD-skearrus.

Dát ahte CD-skearrus lea šáŋŋerseaguhus muitala ahte artista sihke dovdá ja máhttá dáid.  

 

– Wow!

Dát lei vuosttaš reakšuvdna go bidjen johtui skearru. Álggu rájes vuhtto ahte skearru lea hui bures ráhkaduvvon musihkalaččat.

 Vuogas, ráinnas ja buorre jietna.  Máhttá stoahkat jienain, mohkohallat.

Dovdo dieđus jienas ahte lea nuorra lávlu, ja dat ge vuhtto muhtumin lávlagiid teavsttain.

 

Nuorra čalmmiiguin dán máilbmái

Go olmmoš dán jagi geargá vázzimis vuođđoskuvllas, de dalle lea áibbas lunddolaš ahte teavsttat sisdoalu dáfus leat veahá earáláganat go ovdamearkka dihte artisttas gii lea jo náitalan. 

Aŋkke lea somá guldalit dan skearru go lea álki ipmirdit maid lávlu ja dadjá cealkagiin. 

 

Rap ja luohti

Háliidan erenoamážit dadjat moadde sáni guokte bihtá birra mat leat mielde CD:s;  rap-lávlagis mas lea namma  «Atte munnje sáni saji», ja luođis mas namma lea «Oainnáhus».

Dávjá logan ahte rap-musihkas dán áiggis lea seamma funkšuvdna go rockmusihkas lei, namalassii proteastalágan funkšuvdna.

«Atte munnje sáni saji» lea rap ruvkkiid birra, ahte ii hálit daid Sápmái.   

 

Somá go skearrus lea luohti. Somá go iežas agis berošta luođis, muhto ii soaitte dat nu imaš go dán beale Sámis luohti gullo dávjá ja ollu. Muhtimat rohttestit luđiid beare ruovttus, muhtimat juoiggastit almmolašvuođas.

 

Buorre ovttasbargu musihkkariiguin

Dán skearru loahppabuvttadeapmái leaba gusto váikkuhan Roger Ludvigsen ja Kjetil Dalland. Baicce riekta dadjat ahte soai leaba rievttes láhkai veahkehan  musihkalaš oasi heivehit teavsttaide ja melodiijaide maid Emma Elliane lei ieš čállán ja dahkan.  Buorre ovttasbargu.

 

 

Lei somá guldalit álggus gitta lohppii. Ii lean miella bissehit makkár ge lávlaga ja njuiket badjelii čuovvovaš lávlagii. 

«Dovddut eai gielis» lea guldalanveara. Dieđus jus olles iežat eallima leat guldalan beare punklágan musihka, de soaitá ahte dát CD-skearru ii heive dutnje. Muhto jus guldalat musihka miela mielde, beroškeahttá šáŋŋeris, de ávžžuhan du juobe oktii ge guldalastit dán CD-skearru.

 

Oaidnit leaš galle jagi dassážii go Emma Elliane almmuha čuovvovaš CD-skearru. Šaddá somán guldalit movt son de lea ovdánan artistan. 

Fáddásánit
Kultuvra

På forsiden nå