Axel Ánte, dahje Roy Aleksander Lind, almmuhii njukčámánus CD-skearru «Excellente". Dás oainnát olggoža.

Axel Ánte: Tran-ta-ta!

Axel Ánte almmuhii mannan mánu CD-skearru man namma lea «Excellente».

09:18 Cuoŋománu 04. beaivi 2016
Ođastuvvon: 04.04.2016 - 09:51

CD-skearrus leat 12 lávlaga. Measta buot lávlagiid namat loahpahuvvojit gehčosiin «ánte» nu mo «Fánte«, «Diibmuánte», «Adriánte» ja nu ain, earret maŋimuš lávlla, man namma lea «Axelastra». Oktiibuot buot lávlagat bistet 61 minuhta. CD-skearru olggoža govva lea hábmejuvvon hui álkit. Lea váttis dadjat mii lea sivvan – váilevaš ruhtadeapmi vai iešalddis dat lei beare plánejuvvon ná álggu rájes hábmet skearru hui álkit. Aŋkke CD-skearru olggoš muittuha loahpa 1990-logu dahje álggu 2000 CD-skearru olggožiid, mii lea veahá somá, jus geahčastit dasa makkár jagis mii leat ja makkár teknologiijat leat dál. Norgga Sámediggi lei dorjon ruđalaččat CD-skearru almmuheami.

 

Axel Ánte dahje Roy Alexander Lind lea oahpis muhtumiidda go son lea čuojahan earret eará Sagittarius joavkkus.

«Excellente» skearrus artista geahččala lávlut sámegillii ja maiddái juoigat. Muhtun dajahusat, nu mo «tran-ta-ta», buktet beare moji. Ollu lávlagiin Axel Ánte ii lávllo nu mo ipmirdit ollugat dan mii lea lávlut; dalle go gullojit vel sánit. Dávjá son ii ane sániid, muhto ovtta ládje stoahká jienain, ja atná iežas jiena vejolašvuođaid. Bihtás «Buppenánte» gullo Máret Hætta go juoigá. Lea somás bihttá mii buktá moji.


Siskkimus oassi CD-skearru olggožis.

 

«Hei o lei o lei lo»

Lyrihka birra lea viehka váttis maid nu dadjat go measta ii báljo gullo Axel Ánte lávlagiin sániid. Ieš artista Instagramma profiillas návdá dán vuogi juoiggusin. Jietnadit «Hei o lei o lei lo» ii leat vissa doarvái gohčodit mii nu dakkaviđe juoiggusin. Juoiggus vissasit gáibida veahá eambbo go dušše «Hei o lei o lei lo». «Lyrihkka» dahje «juoigan» lea danin viehka ovttageardán, muhto musihkka ja dáidda leat ge dakkár suorggit main dáiddárat ieža mearridit man hámis ovdanbuktit iežaset jurdagiid. Danin lea lunddolaš dadjat ahte vaikko su «juoigan» lea ovttageardán, de aŋkke Axel Ánte dan dahká hui bures. Muđui Axel Ánttes lea buorre jietnagovva, earenoamáš bures dát vuhtto go son lávlu alla šuoŋaid ja «rocke». Dasa gal liikon.

 

- Buktá veahá romantálaš dovdduid

Musihka dáfus skearru lea guovttelágan, juohke lávlagis gávdno iešvuohta mii dagaha juohke lávlaga earenoamážin. Ii sáhte dadjat ahte dat skearrus dahje skearru musihkas lea čielga pop- dahje rock-profiila. Soitet rocklágan šuoŋat eambbo dán skearrus go eará musihkalaš šuoŋat. Oktiibuot skearru lea seaguhus. Musihkalaš oassi skearrus lea buorre. Skearrus gullojit iešguđet čuojanasat ja ritmmat. «Ráfilánte» lávlagis harmonikačuojanas, man gullá lávlaga álggus, buktá veahá romantálaš dovdduid. Čuovvovaš lávlaga, «Ábnormánte», musihkkaoassi lea nuppelágan, gullojit eambbo elektročuojanasat. «Excellente» lávlla lea vissa eambbo rock láganaš lávlla mas bures lea heivehuvvon Axel Ánte jietna, gitára ja eará čuojanasat.

 

Lea dovdu ahte skearru lei bures bargojuvvon studios. Vuhtto ahte skearru lea bures hábmejuvvon musihkalaččat.

 

Oktiigeassu: musihka oassi lea buorre. Dát oassi lea gievrramus bealli dán buktagis. Seammás lea váttis namuhit lávlaga mii lea skearru buoremus lávlla. Axel Ánttes lea buorre jietnagovva mii lokte CD-skearru sisdoalu. Seammás lyrihkka ja juoigan gáibida buorideami vai jávkkašii dovdu ahte «dát gal lea juste seamma go ovddit bihtás».

 

 

 

 

 

 

Fáddásánit
Kultuvra

På forsiden nå