Jovna Vars Smuk - NSR/SáB 2. evttohas nuortaguovllu válgabiirres

13:40 Borgemánu 15. beaivi 2017
Ođastuvvon: 01.09.2017 - 09:30

Válgabiire: Nuortaguovlu

Bellodat: NSR/SáB

Namma: Jovna Vars Smuk

Ahki: 33

Siviiladilli: Singel

 

Beroštumit

Makkár astoáigedoaimmat leat dus?

– Mátkkoštit ja leat fárrolaga olbmáiguin, leat sosiála.

 

Mii lea dat stuorámus maid leat vásihan eallimis?

– Mun illudan gal dan beaivái go gávnnan dan rievttes. Muhto dassážii go dat dáhpáhuvvá, de mun illudan go mus lea luondu bargosadjin gos beasan vásihit fiinna vásáhusaid.

 

Maid dagat go áiggut vuoiŋŋastit?

– Veallán sofas ja geahčan «Netflix».

 

Gii lea du stuorámus ovdagovva ja manne?

– Mu máttut geat leat láhčán dili bearraša boazodollui lohkameahttun buolvvaide.

 

Bargu ja oahppu

Maid don barggat dál ja makkár barggut leat dus ovdal leamašan? Makkár oahppu lea dus?

– Joatkkaskuvlla oahppu. Lean olles rávisolbmo eallima bargan boazodoalus, ja Sis-Finnmárkku diggegotti veahkkeduopmár.

 

Eatnigiella/ giella

– Davvisámegiella, máhtán dárogiela maid.

 

Politihkalaš duogáš

Makkár bellodagaid leat don ovddastan? Leat go leamašan sámediggeáirras?

– Lean guokte jagi leamaš stivramiellahttun NBR:s, gávcci jagi orohatstivrras, orohat 6 Várnjárggas, gávcci jagi Várjjat boazosámisearvvi stivrras.

 

Váibmoáššit

 

Makkár áššiide áiggut bidjat fokusa?

– Areálaáššiide ja sisabahkkemiidda, boraspiriide ja álgoálbmotvuoigatvuođaide.

 

Mii lea du mielas eanemus hástaleaddjin maid Sámediggi ferte čoavdit čuovvovaš áigodaga?

– Sihkkarastit areálaid sámi luonddugeavaheapmái ja boazodollui.

 

Čilge manne/ manne eai galggaše minerála- ja ruvkefitnodagat oažžut lobi ásahit ja álggahit doaimmaid sámi guovlluin?

– Jus ruvkedoaimmat dagahit soahpameahttunvuođa vuođđoealáhusaiguin ja boazodoaluin, de fertejit vuođđoealáhusat ovddemužžan vuoruhuvvot.

 

Čilge doaibmá go dálá boazodoallopolitihkka vai ii. Mii šaddá deháleamos ášši mii guoská boazodollui čuovvovaš áigodagas?

– A-a, eai leat čanastagat das ahte gáržudit guohtunvuođu sisabahkkemiiguin seammás go mearrida boazodolliid boazologu nu ahte eai sáhte ovdánahttit ealáhusa. Lea beare unnán boazodoallogelbbolašvuohta hálddahusas dál, dat ferte rievdat.

 

Eanandoallu, movt sáhttá Sámediggi dahkat sihkkarastin dihte ahte nuorat sáhttet joatkit ealáhusas/ álggahit ealáhusa?

– Doarjja ođasmahttit dálá doaibmavisttiid eanandoalus. Boraspirepolitihkka mii sihkkarastá ealáhusvuođu eanandoalus.

 

Mii lea dat stuorámus hástalus guolástusealáhusas Sámis? Movt sáhttá Sámediggi dahkat nu ahte dat unnimus doalut maid sáhttet birgejumi viežžat guolásteamis?

– Guolástusrievttit fertejit nannejuvvot, vai sápmelaččain ja earáin lea sihkkaris boahtteáigi guolástusas. Mii áigut sihkkarastit eanet guollevuostáváldinrusttegiid vai báikkálaš servodahkii sihkkarastojit buktimat ja bargosajit.

 

Sámegielat, movt berre Sámediggi láhčit dili nu ahte nannejuvvojit čuovvovaš áigodagas?

– Lágidit sámegielkurssaid, doarjut giellaguovddážiid ovdánahttima, nu mo Isak Saba guovddáš Unjárggas. Sihkkarastit buriid mánáidgárdefálaldagaid, okta ovdamearka lea fealtamánáidgárdi gos giella ja kultuvra gievruduvvo. Mun oaivvildan ahte fertet vuoruhit guovlluid gos sámegiella ii leat nu nanus.

 

Makkár ođđa bargosajiid lea dehálaš vuoruhit čuovvovaš áigodagas?

– Eanet fitnodagaid mat fokuserejit báikkálaš biepmu reidema, mátkkeealáhus mii ii gilvvohala vuođđoealáhusaiguin.

 

– Makkár ášši lea čuohcan dutnje eanemusat ja manne?

Boraspireváttisvuohta, go oainnán ieš ealus mo boraspire hearjideapmi billista doaibmavuođu.

 

På forsiden nå