Jury sáddii buohkaid fylkadássái ovddastit Guovdageainnu

Dán jagi ledje nu olu čeahpes oasseváldit NKD:s Guovdageainnus, ahte jurylahtut válljejedje sáddet buohkaid viidáseappot Áltái gos galget fylkadásis ovddastit Guovdageainnu. GEAHČA VIDEO:

15:00 Guovvamánu 27. beaivi 2017
Ođastuvvon: 28.02.2017 - 14:24

Bearjadateahket lágiduvvui Nuoraid Kulturdeaivvadeapmi (NKD) Báktehárjjis, Guovdageainnus.

13 nuora sihke lávlo, dánso, čuojahedje gitára, ráppejedje ja čájehedje iežaset čehppodaga dáidagiin.

 

Vuosttaš geardde fárrolaga
Mia Bongo Norvoll ja Sunna Mari Joakimsen leaba goappašagat ovdal leamaš mielde, muhto eaba goasse fárrolaga.

Soai liikoba dánsut ja leat lávddi alde.

Soai lohkaba NKD dehálažžan nuoraide vai besset čájehit maid sii máhttet.

– Mun lean ovdal searvan NKD:i, muhto dušše dáidagiin. Lean moadde jagi ovdal maid beassan iežan govain viidáset Troandimii, riikadásis gilvalit. Dán jagi mearridin searvat dánssain, go in leat goasse ovdal leamaš NKD lávddi alde. In oaččo nu dávjá vejolašvuođa lávddi alde leat, nu ahte lea hui somá, lohká Sunna Mari Joakimsen.

(Ášši joatká gova vuolábealde)


GOBLINS: Mia Bongo Norvoll (14) ja Sunna Mari Joakimsen (15) liikoba dánsut, ja lei vuosttaš geardi go dánssuiga fárrolaga. Inger Marita Bals

Ávžžuha nuoraid searvat
Dán jagi ledje 13 oasseváldi NKD:s, veahá unnit oasseváldit go diibmá. Láidesteaddji Ole-Gabriel Buljo searvvai diibmá, ja beasai gitta Troandimii, riikadásis gilvalit.

Dan son lohká máilmmi somás vásáhussan leamaš.

– Mu mielas lea hui somá olbmuid ovddabealde hupmat, seammás go mu mielas NKD lea hui dehálaš. Vaikko ieš lean oasseváldi, de lean maid hui olu leamaš veahkkin vai dán jagi maid galgá šaddat NKD. Lea hui dehálaš ahte nuorain lea dákkár lávdi gos besset čájehit iežaset čehppodaga ja maid máhttet. Veahá šállošahtti go ná unnán oasseváldit ledje dán jagi, ávžžuhan áinnas eambbo nuoraid searvat dasa. Mun dieđán Guovdageainnus leat olu čeahpes nuorat, lohká son.

– Mu mihttu lea ahte mus galgá leat hui somá go lean lávddi alde, muhto sávan maid dieđusge ahte beasan viidáset. Lean gávdnan hui olu ođđa olbmáid go diibmá mátkkoštin NKD oktavuođas, geaiguin áinnas háliidan fas deaivvadit dán jagi.

 

Buohkat viidáset
Jury mielas ledje dán jagi hui čeahpes oasseváldit, ja sidjiide lei nu váttis válljet geaid galge šaddet viidáset.

Danne eai oaidnán eará čovdosa go sáddet buohkaid viidáset Áltái gos galget fylkadásis ovddastit Guovdageainnu.

Dohko vulget ge Anne Majjen Buljo, Anne Madeleine Eira Hætta, Jon Lennart Turi, Aina Emilie Siri Bals, Thea Marja Eira, Mia Bongo Norvoll, Sunna Mari Joakimsen, Mathis Eira, Elina Johansen Ijäs, Áslat Issát Eira ja Ole-Gabriel Buljo.

 


DUHTAVAČČAT: Anne Majjen Buljo (17), Anne Madeleine Eira Hætta (17), Jon Lennart Turi (15), Aina Emilia Siri Bals (14), Thea Marja Eira (14), Mia Bongo Norvoll (15), Sunna Mari Joakimsen (16), Mathis Eira (15), Elina Johansen Ijäs (15), Áslat Issát Eira (14) ja Ole-Gabriel Buljo (16) besset buohkat ovddastit Guovdageainnu NKD fylkkadásis Álttás. 
Govven: Inger Marita Bals

 

 

Tags
UKM

På forsiden nå