Almmuhus

Almmuhus

Ruoššas boahtime eare­noamáš olu heaibut Detnui

Guokte hárjeheaddji: BK Tana hárjeheaddji Jan Rikard Johansen (78-jahkásaš), lea gággan nuppi hárjeheaddji láhttái, gii lea 62-jahkásaš Zavurbek Addulkarimov, eret Naryan-Maras. Soai dáidiba fas deaivvadit boahtte vahkkoloahpa. ﷯Preassagovva.

Badjel 150 heaibu, 21 iešguđet searv­vis, viđa našuvnnas, leat searvame Deanu heaibungilvvuide boahtte vahkkoloahpa. Dat leat ain Norgga nubbin stuorámus internašunála heaibungilvvut. 

Published date: 
Duorastat, 17 Ođđajagimánu, 2019 - 09:42
Fáddásánit: 

Deanu heaibunsearvi lágida Tana Cup heaibumis boahtte lávvordaga, ođđajagemánu 19. beaivvi.

– Golmma beaivvis galget badjel 200 heaibungilvvu čađahuvvot guovtti-golmma heaibunláhttis. Sii leat buot agiin, unnoraččat gitta seniordássái. Mii leat rámis go mis leat ain Norgga nubbin stuorámus internašunála heaibungilvvut, dadjá lágideaddji ja heaibunsearvvi jođiheaddji Frode Gundersen.

 

Eanas ruoššat

Dán jagáš Deanu heaibumiidda bohtet ollusat St.Petersburg stuoragávpogis. 

Ruošša bohtet ge eambbo heaibut go eará riikkain bohtet oktiibuot. 

– Nu lea leamaš ovdal maid Deanu Cupas. Lea oalle earenoamáš go olgoriikka našuvdna boahtá eambbo gilvaleddjiiguin go eará riikkain leat oktiibuot dáin gilvvuin, dadjá Frode Gundersen.

Ruoššas bohtet maid Deanu šaldái guoimmuhit, go Murmánskka ritmmalaš sportagymnasisttat galget čájehit máhtuset.

 

Ruhtadoarjaga duohken

Deanu heaibunsearvi lea doallan internašunála heaibumiid Deanus juo 15 jagi. Barentsčállingoddi lea addán maiddái dán jagi doarjaga. Dál adde 90 000 ruvnno prošeaktaruhtan. 

– Dan oktavuođas lea duođai veara namuhit man dehálaš dat doarjja lea leamaš Deanu heaibunsearvái máŋggaid jagiid. Dan haga eat lean sáhttit bovdet nu olu gilvvohalliid Barentsguovllus daidda njunušgilvvuide Deanus, cealká son. 

 

Buohkat háliidit Detnui

Gundersen lea hui rámis dainna go unna báikkážii háliidit nu oallugat boahtit gilvvohallat. Son lohká dan duođaid duođaštuvvot gilvvohallilisttus. 

– Buohkat háliidit Detnui, vaikko mii lea dušše unna čuoggáš máilmmis. Dat lea hui buorre unna heaibunsearvvážii, muhto maiddái lokte Deanu gieldda valáštallama oktavuođas, Finnmárkku heaibunbiirre ja Finnmárkku valáštallanbiirre. Dat čájeha ahte unna searvvážat sáhttet lágidit stuora internašunála gilvvuid. Lea measta jáhkkemeaht­tun ahte stuora gávpogiid heaibunsearvvit feara gos máilmmis vulget guhkás Detnui gilvalit, dadjá Gundersen preassadieđáhusas.

På forsiden nå