Almmuhus

Almmuhus

Oaččui Kultur­departemeantta olmmoš­vuoigat­vuođa bálkkašumi 

BÁLKKAŠUMI JUOHKIN: Kulturministtar Trine Skei Grande (gurut ravddas) geige bálkkašumi Kenneth Hættai (olgeš ravddas), Thor Harald Henriksenii, Harald Amdalii ja Eirik Linaker Berglundii. ﷯Preassagovva: Linda Terese Liv Rosenberg / Kulturdepartemeanta 

Kenneth Hætta oaččui ovttas journalisttaiguin Harald Amdaliin, Thor Harald Henrikseniin ja Eirik Linaker Berglundiin Kulturdepartemeantta olmmošvuoigatvuođa bálkkašumi 2018.

Published date: 
Bearjadat, 9 Skábmamánu, 2018 - 16:01
Fáddásánit: 

Bálkkašupmi juhkkui sidjiide go leat čállán dan stuorra seksuála veahkaválddálašvuođa birra mii lei Divttasvuona suohkanis.

Hætta lei okta dain journa­listtain geat almmuhedje 2016:s VG aviisii 11 nissona ja dievddu birra geat ledje vásihan seksuála veahkaválddálašvuođa Divttas­vuona suohkanis. Ášši dagahii ahte álggahuvvui politiijadutkan.

Jahkebeali maŋŋel ledje poli­tiijat gávnnahan 151 veahka­váldin­ášši, mas oktiibuot ledje 82 gillájeaddji ja 92 olbmo geat balahuvvojedje leat sivalažžan. 40 dáin áššiin ledje seksuála rohco­šeamit vuollel 14-jahkásaš mánáiguin.

 

Áigeguovdilis gažaldagaide ánsu

Bálkkašupmi juhkkojuvvo juohke nuppi jagi journalisttaide geat earenoamáš dásis gozihit áige­guovdilis olmmošvuoigatvuođagažaldagaid Norggas.

– Buoremus journalistihkka lea mielde goziheame fápmostruk­tuvr­raid ja jearrame gažaldagaid jienakeahtes olbmuid ovddas. Buorit journalisttat geat dustet jearrat rievttes gažaldagaid, ja geat nagodit ovdanbuktit ođđasiid dainna lágiin ahte olmmoš sáhttá ipmirdit. Dáinna bálkkašumiin rámidit dákkár journalistihka, lohká kulturministar Trine Skei Grande ráđđehusa ruovttu­siidduin.

Jury oaivvilda earret eará ahte ášši lea botken jávohisvuođa­kultuvrra sámi birrasiin, váikku­han dasa ahte oažžut doaimmaid mat geahčestit ovddos guvlui ja oadjebasvuođa doaimmaid, mat fátmmastit stáda, suohkaniid ja sámiid eiseválddiid ja birrasiid. 

Bálkkašupmi lea 100 000 ruvnno ja litografiija maid dáiddár Håkon Bleken lea ráhkadan. Lei kulturministtar Trine Skei Grande gii geigii bálkkašumi Norsk Redaktørforeninga čakčačoahkki­mis skábmamánu 5. beaivvi. 

 

På forsiden nå