Almmuhus

Almmuhus

Eambbosat boahkkuhedje iežaset 

Eambbosat boahkuhit iežaset vai influeansa ii njoamu sidjiide. Boahtte influeansa áigodat vurdojuvvo skábma- ja juovlamánu mánnomolsašumis. Čájáhusgovva: Heiko Junge / NTB Scanpix

Mannan áigodaga bijahedje eambbosat boahku mii galgá eastadit influeansa. Erenomážit dearvvašvuođabargit leat boahkuhan iežaset.  

Published date: 
Gaskavahkku, 10 Golggotmánu, 2018 - 15:39
Fáddásánit: 

– Mii ávžžuhit olbmuid geat gullet riskajovkui, boahkuhit iežaset vai eai buohccáše váralaš influeanssain, dadjá Álbmotdearvvašvuođainstituhta influeansaossodaga ráđđeaddi Birgitte Klüwer NTB ođasdoaimmahahkii. 

Jáhkkimis bohciida dán áigodaga influeansa skábmamánu ja juovlamánu mánnomolsumis.

Dábálaččat njoammu influeansa 5-10 proseantta Norgga álbmogii. Dat mearkkaša ahte olbmot gártet veallut máŋga beaivvi ja dat gártá divrrasin servodahkii.

Seammás jápmet máŋga čuođi olbmo juohke influeansa áigodagas.

 

14 proseantta boahkuhedje iežaset 

Masá 1,6 miljovnna olbmo gullet riskajovkui ja ávžžuhuvvojit boahkuhit iežaset.

Dán jovkui gullet sii geat leat badjel 65 jagi, fuolahusvisttiid ja buohccesiiddaid ássit, olbmot geain leat kronalaš dávddat ja áhpehis nissonat. Dasa lassin berrejit dearvvašvuođabargit iežaset boahkuhit. 

– Mannan influeansaáigodaga boahkuhuvvui sullii 14 proseantta Norgga álbmogis, ja dat lea guokte proseantta lassáneapmi ovddit áigodaga rájes. Dán leimmet vuordán go diibmá vuvde eanet dálkkasmeari go ovddit jagiid, dadjá Klüwer.

Statistihkalaš guovddášdoaimmahaga logut čájehit ahte 27 proseantta olbmuin geat gullet riskajovkui boahkuhedje iežaset 2017/18 influeansaáigodaga.

Ulbmil livččii ahte 75 proseantta riskajoavkkus boahkuhivčče iežaset.

 

Dearvvašvuođabargit lassánit

Lassi dearvvašvuođabargit leat álgán iežaset boahkuhit.

28 proseantta boahkuhedje iežaset mannan influeansaáigodaga ovdal, jagi ovdal lei lohku 11 proseantta. 

– Influeansaboahkku lea ožžon olu fuomášumi ja vásihit ahte dađi eanet ávžžuhusat, mađi eanet dearvvašvuođabargit boahkuhit iežaset. Dearvvašvuođabargiide lea boahkku nuvttá ja lea hui dehálaš ahte dán fállet bargoáiggis, lohká Klüwer.

 

På forsiden nå