Almmuhus

Almmuhus

– Arctic Race of Norway gilvvut buktet lassi­váikkuhusaid

Stáhtaministtar Erna Solberg sávvá lihkku Colin Joyceii, Rally Cycling, gii vuittii nuppi vuoru sihkkelastingilvvuin. Govas leat maiddái Finnmárkku fylkkasátnejođiheaddji Ragnhild Vassvik, Davvisiidda sátnejođiheaddji Stine Akselsen ja Hurtigruten konsearnahoavda Daniel Skjeldam. Govva: Arctic Race of Norway/Rune Dahl

Bearjadaga bođii stáhtaministtar Erna Solberg njuolgga NHO konferánssas, mii lei Hurtigruten alde gaskkal Honnesvági ja Gilivuona, Arctic Race of Norway sihkkelastingilvvu nuppi vurrui go sihkkelastit jovde mollii Gilivutnii.

Published date: 
Lávvardat, 18 Borgemánu, 2018 - 12:09
Updated at: 
Ođastuvvon: 21.08.2018 - 11:06

Stáhtaministtar lei hirpmástuvvan go nu olusat ledje boahtán Gilivutnii geahččat ja ávvudit go sihkkelastit jovde mollii.
 

– Erenoamáš álbmotfeasta

Gilivutnii ledje čoahkkanan máŋga čuohte olbmo geahččat sihkkelastiid go jovde mollii nuppi vuorus.

– Arctic Race lea erenoamáš álbmotfeasta gos lea somá leat mielde, dajai stáhtaministtar.

Stáhtaministtar Solberg jáhkká dákkár doalut mearkkašit ollu guvlui.

– Dát mearkkašit ollu buohkaide,dát lea sihke somá ja dainna beassat čevllohallat. Lea buorre go dákkár prošeavttain besset bargat, dát  mielddisbuktá olbmuide joavkodovddu birrasis, dajai stáhtaministtar Erna Solberg. 

 

– Čalmmustahtto máilbmái

Stáhtaministtar maid ovdanbuvttii dan maid sihkkelastingilvvut mearkkašit Davvi-Norgii, mii lágiduvvo juohke jagi.

– Arctic Race of Norway buktá stuorra váikkuhusaid. Erenoamážit go dát čalmmustahtto miehtá máilmmi, dat erenoamáš govat mat čájehuvvojit luonddus ja maiddái dat albmotfeasta, dajai stáhtaministtar.

 

 

Vejolašvuođat mátkeealáhusaide

Stáhtaministtar Erna Solberg maid namuhii daid erenoamáš vejolašvuođaid maid Arctic Race of Norway buktá mátkeealáhusaide.

– Dát vásáhusat buktet stuorámus vuittu mátkeealáhusaide. Jus sihkkelastiberošteaddjit vásihit ahte lea somá dáppe sihkkelastit, de dat buktá stuorát beroštumi. Norga ferte dál vuoruhit aktiivadoaimmaid sidjiide geat dán háliidit luomus. Sii dat buktet dan ruđa.

 

Maiddái NHO-hoavda Kristin Skogen Lund oaivvilda Arctic Race čájeha ahte leamaš erenoamáš stuorra ovttasbargofámut dán prošeavttas, ja ahte Arctic Race of Norway lea eambbo go sihkkelgilvvut.

Dán jagi sáddejuvvojit TV-govat Arctic Race of Norway gilvvuin olles 190 riikii, ja máŋga miljovnna olbmot máilmmis oidnet dáid vásáhusaid.

 

På forsiden nå