Almmuhus

Almmuhus

Illu­dahtti go ožžo doarjaga

Kárášjoga Báhččiidsearvi oaččui 250 00o ruvnnu speallanruhtadoarjaga Finnmárkku fylkkagielddas, ja doarjagiin sii áigot hukset elekrovnnalaš fealtabáhčinšilju. Govven: Jan Roger Østby

33 valástallansearvvi prošeavtta Finnmárkkus sáhttet dál illudit go leat ožžon speallanruhtadoarjaga valáštallanhuksehussii. Okta dain servviin mii beassá illudit lea Kárášjoga Báhččiidsearvi.

Published date: 
Duorastat, 7 Geassemánu, 2018 - 15:42
Updated at: 
Ođastuvvon: 12.06.2018 - 09:52
Fáddásánit: 

Finnmárkku fylkkagieldda Kultuvrra, álbmotdearvvašvuođa ja johtalusa váldolávdegoddi mearridii maŋŋebárgga speallanruhtadoarjagiid juohkima valáštallanhuksehusaide ja fysalaš doaimmaide.

Oktiibuot juolluduvvui 32,2 miljovnna iešguđetge valáštallamiidda Finnmárkkus. Badjel bealli dán jagáš ohcamušain juolluduvvui doarjjan.

 

Finnmárkku sámi gielddaid searvvit mat ožžo doarjaga:

Kárášjoga Báhččiidsearvi, 250 000 ruvnnu
Porsáŋggu Báhččiidsearvi, 300 000 ruvnnu
Valáštallansearvi STIL Porsáŋggus, 717 000 ruvnnu
Juovlavuona valáštallansearvi Deanus, 590 000 ruvnnu
Deanu heastavaláštallansearvi, 356 000 ruvnnu
Máze valáštallansearvi, 203 000 ruvnnu
SAARELA VEL Porsáŋggus, 390 000 ruvnnu

Ožžo 250 000 ruvnnu 

Kárášjoga Báhččiidsearvvi jođiheaddji Inger-Ann Paulsen illudii go gulai ahte sin searvi lea ožžon 250 000 ruvnnu speallanruhtadoarjaga Finnmárkku fylkkagielddas, son ii lean ožžon dan dieđu ovdal go Ávvir riŋgii sutnje.

Son muitala searvi lea plánen hukset elektrovnnalaš fealtašilju báhčinšilljui.

– Lea issoras buorre go mii leat ožžon doarjaga. Mis ii leat elektrovnnalaš fealtašillju, nu ahte de šaddá olu álkibun báhččiide go dalle boahtá šerbmii galle bliŋkka lea deaivan. Doarjja man leat ožžon lea stuorra skeaŋka, go dat máksá oastit elektrovnnalaš báhčinšilju ja dan ii livčče mis leamaš vejolaš jus eat livčče ožžon doarjaga dasa, lohká Kárášjoga Báhččiidsearvvi jođiheaddji Inger-Ann Paulsen.

 

14 gieldda ožžo doarjaga

Finnmárkku fylkkagielda lea 2018 ohcamušain dohkkehan 57 ohcamuša gielddain, servviin ja joavkkuin, oktiibuot ohccojuvvui sullii 96 miljovnna ruvnnu.

Jus buohtastahttá diimmáš ohcamušsupmiin, de lea ohcamušsupmi lassánan mealgat.

– Dán jagáš ohcamušvuorru čájeha ahte dárbu lea lassánan hukset ja ođasmahttit valáštallanhuksehusaid Finnmárkkus. Oktiibuot leat 14 gieldda mat leat ohcan dán jagi. Lea illudahtti oaidnit maiddái ahte Láhpi suohkan ja Muosáid gielda leat maiddái ohcan, dadjá Finnmárkku fylkkagieldda Kultuvrra, álbmotdearvvašvuođa ja johtalusa váldolávdegotti jođiheaddji, Geir Ove Bakken.

 

Fertejit fuomášuhttit

Váldolávdegotti jođiheaddji váillaha doaimmalašvuođa gielddain mat eai leat ohcan speallanruhtadoarjaga maŋimuš jagiid.

Son deattuha ahte speallanruhtadoarjja lea guovddáš váikkuhangaskaoapmi valáštallanhuksehusaide iežat gielddas.

– Muhtin gielddat leat huksen ja ođasmahttán valáštallanhuksehusaid mat eai leat ruhtaduvvon speallanruhtadoarjagiin. Dat ii leat nu buorre, go lea vejolašvuohta oažžut beali huksehusgoluin ruhtaduvvot speallanruhtadoarjagiin, dadjá Bakken preassadieđáhusa bokte.

Unnán ohcamušat muhtin gielddain lea dan dihte go eai leat bargit geain leat ovddasfástádus dan suorggis.

Váilevaš gelbbolašvuohta ja resursageavaheapmi lea stuorra váikkuhus gielddaid valáštallanrusttegiid ovdánahttimii.

 

Doarjjarámma Finnmárkui lassánan

Maŋŋá stáhtaráđi mearrádusa miessemánu 4. beaivvi 2018 váldojuohkimis, várrejuvvui speallanruhtadoarjja valáštallamiidda 1,4 miljárdda ruvnnu «Valáštallanhuksehusaide gielddaide» postii.

Obbalaš logus lea Finnmárkui várrejuvvon 31,4 miljovnna ruvnnu. Jus buohtastahttá diimmá doarjjarámmáin, de lea Finnmárkui leamašan 6 miljovnna ruvnnu lassáneapmi.

På forsiden nå