Almmuhus

Almmuhus

UiT ávvudii Magga

Diibmá devddii Ole Henrik Magga 70 jagi, ja dan čalmmustahtte Sámi allaskuvllas Guovdageainnus. Odne ávvudit Sámedikki vuosttaš presideantta maiddái UiT Norgga árktalaš universitehtas Romssas. Vuorkágovva: Sárá Máret Rávdná Oskal

Vuosttaš sámediggepresideanta, Ole Henrik Magga, lea 70 jagi ja leamaš universitehta gudnedoavttirin 10 jagi. Dán ávvudit sierra seminárain.

Published date: 
Bearjadat, 9 Guovvamánu, 2018 - 09:07
Updated at: 
Ođastuvvon: 09.02.2018 - 09:23
Fáddásánit: 

Romssa 2018 Sámi vahkku ja UiT Norgga árktalaš universitehta 50 jagi ávvudeami oktavuođas bovdejedje Ole Henrik Magga ávvuseminárii ikte.

Universitehtas dáhttot čalmmustahttit ahte Sámedikki vuosttaš presideanta devddii 70 jagi borgemánu 12. beaivvi 2017:s ja ahte leat vássán logi jagi dán rájes go Magga šattai universitehta gudnedoavttirin.

 

Viiddis prográmma

Semináras guovdilaste Sámi vuoigatvuođalávdegotti barggu erenoamážit ON siviila ja politihkalaš vuoigatvuođaid konvenšuvnna 27. artihkkaliin, ja dan dehálaš ja vuođđudeaddji sámepolitihkalaš ovdáneami mii lei 1980-logus.

Dasa gullet giella- ja kulturbarggut ja giellavuoigatvuođat, sámi váldoorganisašuvnnaid njunušrolla ovdal go ásahusat ceggejuvvojedje ja boazodoallolágaid guhkes sárgát.

 

Dálá áigi

Sárgát gessojuvvojit dálá guovddáš digaštallamiidda sámi siviilaservodaga birra, álbmotrievttálaš ovdáneapmái, riikkaidgaskasaš eamiálbmotdilálašvuođaide ja sámi ásahushuksemiidda maidda maid gullá dutkan ja alit oahppu.

Dán jagi lea 30 jagi áigi go Stuoradiggi dohkkehii sámelága, ja seminára guovdilastá guovddáš politihkalaš fáttáid Sámedikki barggus, nugo guolástus-, minerála- ja giellapolitihka, mas konsultašuvnnat doibmet váikkuhanfámu mekanisman, čállá UiT neahttasiiddustis.

På forsiden nå