JUOVLAČUOVGGAT: Ránnjá soaitá liikot čiŋahit viesu juovllaid, dahje soaittát ieš liikot. Dan sáhttá váidit, jus muosehuhttá. Čájáhusgovva: Shutterstock

Lea lohpi váidit ránnjá juovlačuovggaid

Olusat čiŋahit viesuid ja ásodagaid dál adveantta áiggi. Muhto geasa sáhttá váidit jus ránnjá lea badjelmeari čiŋahan viesus?

17:58 Juovlamánu 06. beaivi 2017
Ođastuvvon: 07.12.2017 - 09:19

Juovlamánu sáhttá oaidnit olu čiŋahuvvon viesuid, juovlačuovggat seinniin ja dáhkiin.

Viessohuksensearvi Norske Boligbyggelags Landsforbund (NBBL) dieđiha dál preassadieđáhusas ahte lea lohpi váidit, jus ránnjá orru badjelmeari viimmáskan čuovggaiguin.

 

Vejolaš váidit

– Eai gávdno sierra njuolggadusat ja lágat juste juovlačuovggaid várás. Muhto eaiggátsekšuvdnalágas ja ássanriektelágas leat njuolggadusat mat čujuhit ahte viessu ii ábut geavahuvvot nu ahte lea vuoigatmeahttun váivvádussan ránnjáide, lohká NBBL advokáhtta Henning Lauridsen.

Čuovggat mat ravket ija beaivvi, vihtta-guhtta vahkku njuolgut, sáhttet leat váivvádussan jus orrot lávgat, lohká son.

 

– Gulahallan lea buoremus

– Dábálaččat sáhttá stivrajođiheaddjái váidit, muhto buoremus lea ránnjáin gulahallat. Sáhttá earret eará šiehttat jáddadit čuovggaid ija beallái, go olbmot galget nohkkat, lohká advokáhtta.

Jus dat ii doaimma, de ferte stivrajođiheaddjái váidit. Ássanriekteláhka ferte sáhttit cuiggodit čiŋaid mat leat váivvádussan ránnjáide.

 

Mearrida man lahka lea

Jus orru priváhta viesus, de lea váddásat váidit ja doahttaluvvot. Ránnjálága nubbi paragráfa deattuha gal ahte ii ábut dahkat juoidá mii lea vuoigatmeahttun váivvádussan ránnjáide.

– Muhto soaitá fertet oalle olu ovdal go dan sáhttá geavahit juovlačuovggaide. Lea man lávgat orrot, mii mearrida. Jus lea buorre gaska viesuin, de galgá oalle olu ovdal go sáhttá váidimiin oažžut ránnjá jáddadit čuovggaid, lohká Henning Lauridsen, NBBL advokáhtta.

Fáddásánit
Ođđasat

På forsiden nå