JOHTTI ČÁJÁHUS: Suohpanterror, Synnøve Persen ja Geir Tore Holm bohtet Kárášjohkii čájáhusain mii Tråante doaluin lei oaidninláhkái. Govva: Suohpanterror

Johtti čájáhus boahtá Káráš­johkii

Prošeavtta vuosttaš eahket lei guovvamánus Tråante ávvuvahkus. Dál dat boahtá Sámi dáiddaguovddážii, Kárášjohkii.

09:58 Juovlamánu 07. beaivi 2017
Ođastuvvon: 07.12.2017 - 10:41

Čájáhusain Sámi Dáiddaguovddáš ávvuda ávvujagi, ahte leat čuođi jagi vássán dan rájes go vuosttaš sámi riikačoahkkin lei Troandimis.

«Čájet Ivnni: Vuostálastte, Čuožžil, Ovddit» lea dáiddaprošeavtta namma, das leat earret eará čájáhusat, ovdanbuktiimat, akšuvnnat ja lohkamat.

 

Rievdá juohke háve

Sámi dáiddaguovddáš čállá preassadieđáhusas ahte prošeakta johtá, ja rievdá, ja juohke háve go čájehuvvo, das lea ođđa hápmi.

SDG:s čájáhusaid ja installašuvnnaid mieđuštit lohkamat, ovdanbuktimat ja dáiddaakšuvnnat olgun.

Prošeavtta bajilčála, Čájet Ivnni, lea ožžon inspirašuvnna Synnøve Persena njuohtanprošeavttas «Gii ballá?».

Persen lea ráhkadan áibbas ođđa ráiddu njuohtamiid, maidda gullet guokte oasi. Dat apostroferejit Norgga ja Ruoŧa leavggaid, ja nu gulahallet njuolga dáiddára iežas sámeleavggain, mii geavahuvvui 1970-logu akšuvnnain ja vuostálastimiin.

 

Suohpanterror ja Holm

Rahpan lea juovlamánu 9. beaivvi, ja doppe galget dáiddárat nu go Synnøve Persen, Geir Tore Holm ja Jenni Laiti ovdanbuktit dáidagiid.

Geir Tore Holm suokkarda jahkodagaid, birrasa ja gullevašvuođa dihko báikái.

– Dáiddáriid mihtilmas ja erenoamáš smávva diŋggažat juogadit saji maiddái leavggain, mii lea gal oalle gollan ja ráigánan, čállá Sámi dáiddaguovddáš preassadieđus.

Čájáhusas lea maiddái Suohpanterrora ođđa kolláša, mii dán vuoru ovdanbuktá ja doarju Ellos Deatnu- lihkadusa ja Finnmárkku biras- ja eananaktivismma ja Sámi Girl Gang.

Čájáhus bistá guovvamánnui. Leat ožžon doarjaga Norgga kulturráđis, Norgga Sámedikkis ja Ruoŧa Sámedikkis.

Fáddásánit
Kultuvra

På forsiden nå