Čájáhusgovva: Alf Ove Hansen / SCANPIX

Beana bovttii oađđiolbmuid

Beana mii ciellá máŋgii muosehuhtte, muhto dán háve ii lean muosehuhtten veaháš ge.

13:10 Juovlamánu 10. beaivi 2017
Ođastuvvon: 11.12.2017 - 10:28

Mannan ija leaba goit guovttis hui ilus go beana cielai.

Soai leigga guorbmebiillas oađđime Eibos, olggobeale Álttá, go beana álggii ciellat.

De gulláiga ja fuomášeigga ahte guorbmebiila lea buollán.

– Soai leaba viggan čáskadit guorbmebiilla. Vel tráktor ge lea leamaš báikkis viggan muohttagiin čáskadit, muhto ii lean ávki go biila lei buollimin olles leahtuin go buollinčáskadeaddjit bohte báikái, muitala Finnmárkku politiijaguovllu operašuvdnajođiheaddji, Gunn Rigmor Søderholm.

Beana galgá leat sudno leamaš.

 

Divššu ožžon

Søderholm muitala ahte dan guoktá dolvo dearvvašvuođaguovddážii gos leaba divššu ožžon.

– Nubbi lei boaldán gieđa. Jáhkkimis go leat viggan čáskadit buollima, muitala son.

– Dan mađe go dán rádjai leat beassan iskat, de lea jáhkkimis biilla liige liekkadanrusttet, nu gohčoduvvon webasto, mii lea buolligoahtán. Politiijat dutket ášši, muitala Søderholm vel loahpas.

Muđui leat doarrumat, narroleamit, gárrenvuoddjit ja skohtervuoddjit ja diehttelasat luovosbeatnagat mat begget.

 

Guovdageaidnu:

Esso bensiidnastašuvnna luhtte leat vuojašan skohterat. Politiijat ožžo dieđu, ja vulge geahččat. De ledje guokte skutervuoddji skuteriiguin das.

Go politiijat bohte de gal bijaiga báhtui. Ii goappásge jealbma.

 

Álttás:

16-jahkásaš luntta bissehalai go lei biillain vuoddjiime. Politiijat leat hupman su váhnemiiguin, ja eai jáhke luntta beassá jurddahit vuodjinkoartta birra go deavdá 18-jagi.

Muđui leat dorron, narrolan ja muhtumat leamaš beare gárremin.

 

Leavnnjas:

Biilavuoddji lea vuoddján biillain johtolatrieggá badjel. Politiijat várohit biilavuoddji leamaš gárremin.

På forsiden nå