KULTURDEPARTEMEANTA GALGGAŠII LOKTET OIDNOSII NORGGA EAMIÁLBMOGA: – Leat njuolggut hoigame eret sin ovddasvástádusa. Kulturdeparteameanta ii oainne ahte sis leat maid ovddasvástádus loktet oidnosii Norgga eamiálbmoga, lohká Anne May Olli, RiddoDuottarMuseaid direktevra, gii ovddasta njealji dain museain main lea sáhka. Govven: Astrid Helander (Vuorkágovva)

Sámi kultur­árbi ii sáhte sirdo­juvvot sámi museaide

Guhtta sámi musea livčče ožžon 2000 museadávvira mat leat oassin sámi kulturárbbis, muhto eai sáhte vuostái váldit daid ovdal go visttiid dilli buoriduvvo. Anne May Olli, RiddoDuottarMuseaid direktevra oainnášii Kulturdepartemeanttas ovddasvástádusa divodit museaid.

14:24 Skábmamánu 24. beaivi 2017

Norgga álbmotmusea lea máhcahan 2000 museadávvira ruovttoluotta sámi museaide.

Váttisvuohta lea dat ahte sámi museat leat beare heajos stánddas, eai ge sáhte vurkkodit daid dávviiriid mat leat oassin sámiid kulturbárbbis.

 

Vuolláičálle historjjálaš šiehtadusa

Norgga álbmotmusea ja Kulturhistorjjálaš musea vuolláičálle 2012:s historjjalaš šiehtadusa Sámedikkis.

Šiehtadus galggai sihkkarastit ahte bealli musea njealljeduháha sámi museadávviriin galge máhcahuvvot ruovttoluotta Sápmái, dan guđá sámi museii mat leat namuhuvvon šiehtadusas.

– Prošeakta galggašii loahpahuvvot giđđii, muhto dál orru nu ahte dat bargu maŋiduvvo, čállá Klassekampen.

 

Sámi museat fertejit ođasmahttojuvvot

Vuolláičállon šiehtadusas čuožžu ahte dát sámi dávvirat eai oaččo sirdojuvvot museaide main lea heajut gáhttendilalašvuohta dávviriidda go Norgga álbmotmuseas.

Dain museain gosa dat galge sirdojuvvot ii leat dohkálaš dilli ja dávvirat eai sirdojuvvo ovdal go dat guhtta sámi musea ođastuvvojit. Dasa ii leat museain ii ge Sámedikkis ráđđi.

 

Duvdet eret ovddasvástádusa

Sámediggi lea bivdán veahki Kulturdepartemeanttas, muhto ráđđehusa evttohusas 2018 stádabušehttii ii oidno dát váldon mielde.

– Leat njuolgut duvdime eret iežaset ovddasvástádusa. Kulturdeparteameanta ii oainne ahte sis leat maid ovddasvástádus loktet oidnosii Norgga eamiálbmoga, lohká Anne May Olli, RiddoDuottarMuseaif direktevra, gii ovddasta njealji dan museas main lea sáhka.

Klassekampen ii ožžon kommentára Kulturdepartemeanttas.

(©NTB)

Fáddásánit
Kultuvra

På forsiden nå