OLUSAT MOLSON BELLODAGA: Olles 32 proseantta dán čavčča jienasteddjiin molso bellodaga mannan válgga rájes. Govva: Terje Pedersen / NTB Scanpix

Juohke goalmmát olmmoš molssui bello­daga stuora­digge­válggas

32 proseantta jienasteddjiin jienastedje eará bellodaga mannan válggas, go ovddit válggas. Gurut massii eanemus jienasteddjiid, ja Guovddášbellodat fas doalahii eanemus jienasteddjiid.

10:30 Skábmamánu 08. beaivi 2017
Ođastuvvon: 08.11.2017 - 10:45

Statistihkalaš guovddášdoaimmahusa ja Servodatdutkama instituhtta leat almmuhan ođđa loguid.

Gurut oaččui 4,4 proseantta jienain mannan válggas, muhto doalahii dušše 34 proseantta jienasteddjiin. Ruoná birasbellodat doalahii 44 proseantta jienain. Dát guokte bellodaga masse eanemus jienasteddjiid eará bellodagaide.

 

Guovddášbellodagas oskkáldas jienasteaddjit

Guovddášbellodat doalahii 86 proseantta 2013 jienasteddjiin, ja Ruoksat fas doalahii 84 proseantta maŋemuš ovddit válgga jienasteddjiid.

Maiddái Olgeš doalahii olu jienasteddjiid. 70 proseantta geat jienastedje Olgeža 2013:s, jienastedje maiddái Olgeža dán čavčča válggain. Ovddádusbellodat ja Bargiidbellodat doalahedje 67 proseantta jienasteddjiin.

Risttálaš Álbmotbellodat doalahii 64 proseantta jienasteddjiin ja Sosialisttalaš Gurutbellodat fas 60 proseantta.

 

Lonohallet jienasteddjiid

Statistihkalaš guovddášdoaimmahus čállá ahte lea dábáleabbo ahte jienasteaddjit sirddášit bellodagaid gaskkas main lea muhtun muddui seamma politihkka, go ahte jienasteaddjit ollásit jorggihit.

Ruoksat ja Bargiidbellodat lonohet eanemus jienasteddjiid ruksesruoná bealde. Olgeš ja Ovddádusbellodat fas borgárlaš bealde.

Sosialisttalaš Gurutbellodat ja Ruoná birasbellodat masse jienaid Ruoksadii, muhto seammás vižžet jienaid Guruhis.

Sosialisttalaš Gurutbellodat ja Guovddášbellodat vižžet dattetge jienaid goappaš bealde, ja Risttálaš Álbmotbellodat fas massá jienaid daidda bellodagaide.

(©NTB)

Fáddásánit
Stuorradiggeválggat

På forsiden nå