DIKKIS: vihtta dievddu leat Ruoŧas áššáskuhtton goddán ráfáiduhtton boraspiriid. Čájáhusgovva: Nils Johan Vars

Viđas áššá­skuhtton lobihis bivddu okta­vuođas Ruoŧas: Galget leat filbmen bahá­daguid

Son guhte lea váldoolmmoš áššis galgá leat boazobargi, ja lea áššáskuhtton goddán golbma guovžža ja golbma albasa.

08:52 Golggotmánu 17. beaivi 2017
Ođastuvvon: 17.10.2017 - 10:22

Mannan bearjadaga gárvvistii áktor, Åse Scoultz, ášši mas 23 čuoggá muitalit maid vihtta dievddu galget Norrbottenis dahkan.

Earret eará leat sii áššáskuhtton goddán gávcci ráfáiduhtton boraspire gaskal 2012 ja 2016.

Sii leat maid áššáskuhtton vel roavvábut rihkkon bivdolága, veahkkin leamaš dan bargamis, rihkkon bissolága ja rihkkon maid nállelága go leat ráfáiduhtton elliid goddán.

Dan čállá svt.no sin neahttasiiddus.

 

Boazobargi

Dievddut leat gaskal 36- ja 73-jahkásaččat, ja váldoolmmai áššis, galgá leat 46-jahkásaš Norrbottena boazobargi.

Ášši lea Luleju diggegottis dán vahku, álggii mánnodaga ja galgá bistit njeallje beaivvi.

46-jahkásaš dievdu lea ge dat gii lea áššáskuhtton roavvámus dagu dahkan.

Son lea áššáskuhtton goddán golbma guovžža ja golbma albasa, ja maid eará unnit rihkkosiid ovddas áššáskuhtton seamma áššis.

 

Vuoras áddjá

Okta sis geat leat áššáskuhtton lea váldoolbmá áhčči, 73-jahkásaš dievdu.

Son galgá leat leamaš mielde ovtta dan golmma guovžžas goddán, ja maid rihkkon eará bivdolágaid ja bissolágaid.

Muđui galgá maid rihkkon bivdo- ja bissolága.

Earát geat galget leat mielde leamaš lea váldoolbmá nubbivilbealli, 37-jáhkasaš dievdu, 39-jahkásaš dievdu, ja okta eará dievdu vel gii lea eiseválddiid ovddas bargan.

 

Harcasan albbas

Dikkis boahtá ovdan ahte sii galget leat filbmen bahádaguid, ja politiijat leat duoguštan telefuvnnaid main dakkár filmmat galget leat.

Áktor geavaha daid dál duođaštussan dikkis.

Earrát eará čájeha okta filbma go albbas harcasa beahcegeahčái.

Dohko galgá leat biddjon bivdorusttet mainna galgá harcasit, ja aitto dasa lea ge albbas mannan ja nu maid harcasan.

 

På forsiden nå