SIHKKARASTEN STIPEANDDA LOGI JAHKÁI: Sofia Jannok lea okta dan birrasii 40 dáiddariin Ruoŧas geat dál leat ožžon stuora stipeandda Ruoŧa dáiddalávdegottis. Govven: Silje Malene Varsi.

Stuora stipeanda Sofia Jannokii

Sámi artista Sofia Jannok oažžu 1,3 miljovnnasaš stipeandda Ruoŧa dáiddalávdegottis Konstnärsnämnden.

10:33 Golggotmánu 21. beaivi 2017

Dáiddalávdegoddi Konstnärnämnden lea almmuhan dál geaidda juolludit stipeanddaid. Sámi artista Sofia Jannok ja dánsár Ola Stinnerbom leaba ožžon stipeandda.

Stipeanda lea logi jagi badjel, ja obbalaš supmi lea birrasii 1,3 miljovnna ruvnno juohkehažžii. Dan dieđiha Västerbottens-Kuriren aviisa.

– Stipeanddat mearkkašit ahte badjelaš njealljelogi dáiddára ožžot ekonomalaš sihkarvuođa guhkit áiggi badjel, vai sis galgá vejolašvuohta ovddidit iežaset dáiddalašvuođa, lohká Konstnärnämnden jođiheaddji.

 

Bođii illusáhka

Sofia Jannok lea dovddus sámi artista, Jielleváris eret. Son álggahii artistaeallima Sofia ja Anna joavkkus, nuorra nieidan. Maŋŋil son lea akto almmuhan máŋga skearru. Son lea guktii evttohuvvon Grammy bálkkašupmái.

Jannok čállá iežas Instagram siidui ahte lei stuora illusáhka go oaččui diehtit, go ii lean ieš ohcan ge oažžut stipeandda.

– Eai leat rájit giitevašvuođas man dovddas. Earret go dorvvolaš friddjavuohta go beasan čállit makkár musihka háliidan, go háliidan, čállá Sofia Jannok ja giitá.

Sofia Jannok vuittii ge Sámi Grand Prix lávlunoasi 2003s. Nubbi Sámi Grand Prix vuoiti, Ola Stinnerbom lea maid ožžon seamma stipeandda.

Son lea koreográfa, dánsár, musihkkár ja juoigi. Dan son lea maŋemuš 20 jagi bargan. Son vuittii Sámi Grand Prix lávlunoasi 2007:s «Snow Flow» lávlagiin.

Fáddásánit
Kultuvra

På forsiden nå