Máilmmis billašuvvá dahje bálkestuvvo goalmmádasoassi borramušas mii buvttaduvvo, dán dáhtot Norgga borramušsuorggifitnodagat ja eiseválddit buoredit. Čájáhusgovva: NTB Scanpix

Šiehtadan unnit borramuša bálkut

Norgga fitnodagat ja eiseválddit dáhttot unnidit borramuš-bálkuma beliin ovdal 2030.

11:02 Golggotmánu 02. beaivi 2017

Oktiibuot 12 borramušsuorggifitnodaga ja vihtta departemeantta leat vuolláičállán šiehtadusa man ulbmil lea unnidit borramuš-bálkuma beliin 2030 rádjái.

Máilmmis billašuvvá dahje bálkestuvvo goalmmádasoassi borramušas mii buvttaduvvo. Norgalaš bálkesta gaskamearálaččat 42 kilo borramuša jahkásaččat.

Dát lea sihke eiseválddiid ja borramušsuorggifitnodagaid mielas duođalaš.

 – Borramušsuorggis leat jo buoridan dábiid. Borramušbuvddat hálbbidit biepmuid ovdal billašuvvet ja láibbiid vuvdet hálbái ovdal giddenáiggi. Boradanbáikkit maid vuvdet borramušaid hálbbibui ovdal go giddejit. Mun jáhkán eanet doaibmabijut fuomášuvvojit boahtteáiggis. Go fitnodagat vuolláičállet šiehtadusa, de čájehit ahte váldet borramuš-bálkuma hástalusaid duođas. Sullasaš šiehtadus mas lea ná stuora áigumuš ii gávdno eará sajis go Norggas, dadjá dálkkádat- ja birasministtar Vidar Helgesen ráđđehusa neahttasiidduide.

Fáddásánit
Ođđasat

På forsiden nå