Bargiidbellodaga Elisabeth Erke nammaduvvo Sámedikki dievasčoahkkinjođiheaddjin boahtte vahku go ođđa Sámediggi vuođđuduvvo. Vuorkágovva: Silje Malene Varsi

Erke vállje­juvvo dievas­čoahkkin­jođiheaddjin

Bargiidbellodat beassá jođihit Sámedikki maiddái boahtte njeallje jagi, ja Elisabeth Erke lea válljejuvvon ámmáhii.

11:46 Golggotmánu 03. beaivi 2017
Ođastuvvon: 03.10.2017 - 15:24

– Mii oaivvildat ahte Sámedikki vieru mielde gullá dievasčoahkkinjođiheaddji ámmát opposišuvdnii prinsihpalaččat. Dan bokte oidno opposišuvnna rolla Sámedikkis, lohká Norgga Sámiid Riikasearvvi presideantaevttohas ja álgi sámediggepresidenta Aili Keskitalo preassadieđáhusastis. 

 

Čuvvot vieru

Juovlamánus go Bargiidbellodat ovttas eanetloguin mearridedje bálkestit NSR unnitlogu stivrejumi, de mearridii ođđa eanetlohku doalahit dievasčoahkkinjođiheaddji ámmáha iige addit NSR:i opposišuvdnii dan ámmáha nu mo lea Sámedikkis leamaš árbevierrun.

Dievasčoahkkinjođiheaddji ámmáha vieru leat buot bellodagat Sámedikkis árvvus atnán, ja lea doaibman sihkkarastit ahte opposišuvnnas leat čielga doaimmat ja rollat Sámedikkis. 

 

Bb ja NSR čoahkkinastán

Ovdal go Sámediggi vuođđuduvvo golggotmánu 11.-12. beaivvi 2017:s leat NSR ja Bargiidbellodat, mat leat Sámedikki guokte stuorámus joavkku, čoahkkinastán das mo bargu Sámedikkis galgá jođihuvvot boahttevaš áigodagas. 

Bargiidbellodaga Elisabet Erke lea válljejuvvon dievasčoahkkinjođiheaddjin, ja dan muitala Ronny Wilhelmsen danne go Wilhelmsen ieš lea bellodaga parlamentáralaš jođiheaddji, de lea lunddolaš ahte várrepresideantaevttohas oažžu jođihanámmáha.

Bargiidbellodat oaivvilda dáinna ortnegiin šaddat vissis fápmodási posišuvnna ja opposišuvnna gaskka ja ahte das lea dehálaš doaibma Sámedikkis.

– Dat mii dáhpáhuvai mannan juovlamánus mielddisbuvttii ahte mii eat fuolahan dan. Mis leamaš buorre gulahallan NSR:in dán áššis, lohká Bargiidbellodaga Ronny Wilhelmsen preassadieđáhusastis. 

 

Galgá šaddat čálalaš njuolggadussan

Bargiidbellodat ja NSR leat ovttaoaivilis ahte dát prinsihppa galgá čállot čálalaččat vai čuovvuluvvo boahtteáiggis. 

– Mun oaivvildan ahte Sámediggái lea buoremus joatkit daid čálalaš ja čálekeahtes vieruid. Lea dehálaš oassi parlamentáralaš vierus ja oassi Sámedikki ásahushistorjjás, lohká Keskitalo.

Dát ortnet ahte opposišuvdna jođiha Ealáhus- ja kulturlávdegotti, ja lonuhanortnega gaskal dán guokte stuorámus joavkku, leat eará dakkáraš vierut maid NSR ja Bargiidbellodat háliidit fas ásahit dán sámediggeáigodagas.

Fáddásánit
Válggat 2017

På forsiden nå