Guovdageainnu suohkan ovttas Guovdageainnu demeansaservviin bovde berošteddjiid boahtit oahppat demeanssa birra. Vuosttáš vejolašvuohta lea boahtte mánnodaga, golggotmánu 23.beaivvi. Kurssas váldet ovdán earret eará fáttáid nu go demeansabuhcciid ja sin oapmahaččaid vuoigatvuođaid, ergoterapiija, veahkaváldin ja olu eará. Govven: Ovlla Gaup (Vuorkágovva)

Oahpahit demeanssa birra oapmahaččaide

Lea go dus lagas olmmoš geas lea demeansa ja háliidivččet diehtit eambbo dán dili birra? De lea dát kursa dutnje

09:06 Golggotmánu 21. beaivi 2017

Guovdageainnu suohkan ovttas Guovdageainnu demeansaservviin doalla oapmahaččaidskuvlla demeansabuhcciid oapmahaččaide, fulkkiide ja lagas olbmuide.

 

Fágaolbmot logaldallet demeanssa birra

Oapmahaččaidskuvla lea nuvttá sidjiide geat háliidit oahppat eambbo demeansabuozanvuođa birra. Kurssás leat fágaolbmot geat logaldallet ja biddjo áigi ságastallamiidda ja digástallamiidda.

Kurssas váldojit ovdán fáttát nu go earret eará oapmahaččaid vásáhusat, hástaleaddji láhttenvuohki, demeansabuhcciid ja sin oapmahaččaid vuoigatvuođat, veahkaváldin lagas relašuvnnain ja veahkke- ja dikšunfálaldagat suohkanis.

Logaldallamat dulkojuvvojit ja gussiide lea guossoheapmi. Buohkat geat beroštit gullát eambbo dán birra ožžot boahtit čuovvut kurssá, ii dárbbaš dieđihit ovdagihtii, dieđiha Guovdageainnu demeansasearvi Facebookas.

 

Njeallje kursaeahkeda

Oapmahaččaidskuvla lágiduvvo 4 eahkeda ja buot kurššat dollojuvvojit dearvvašvuođaguovddážis Guovdageainnus. Kurssat leat mánnodaga 23.10.17, distaga 24.10.17, mánnodaga 30.10.17 ja distaga 31.10.17. Buot kurssbeaivvit álget diibmu 17.00 ja bistet diibmu 20.00 radjái.

Fáddásánit
Ođđasat

På forsiden nå