SÁMI MÁNÁID HÁSTALUSAT: Sámediggi leat dál beassan muitalit ON manaidlávdegoddái makkár hástalusat sis leat. Govven: Heiko Junge / NTB scanpix

ON mánáidlávdegoddi beasai gullat sámi mánáid hástalusaid birra

Sámedikki ovddasteaddjit čoahkkinaste gieskat ON mánáidlávdegottiin Genéves. Sámediggi ovdanbuvttii muhtun hástalusaid maid sámi mánát ja nuorat vásihit.

11:54 Golggotmánu 20. beaivi 2017

Gieskat ledje Sámedikki ovddasteaddjit Genéves hupmame sámi mánáid ja nuoraid hástalusaid birra.

Sii besse váldit ovdan olu hástalusaid, earret eará sin bealis deattuhuvvui ahte sámi mánáid vuoigatvuođaid, dan ektui go leat mánát, ferte geahččat fárrolaga sin vuoigatvuođaiguin go leat álgoálbmot.

Dan čállet sii preassadieđus.

 

Rašis joavku

Genéves válddii Sámediggi maid ovdan dan duođalaš hástalusa mii sámi mánáin lea go leat mánáidsuodjalusa fuolahusas ja go dat leat erenoamáš rašes joavku, de eai álo biddjojuvvo biebmoruovttuide main lea máhttu sámi giela ja sámi kultuvrra birra.

 

Sámegiel bargit

Sámediggi muitalii hástalusaid birra mat sámi bálvalusfálaldagas leat, earret eará dan geažil go váilot ollu sámegielat bargit sihke dearvvašvuođasuorggis, mánáidgárddiin ja skuvllain.

Dasto raporterii Sámediggi ahte lea stuorra dárbu dutkat fáttáid nu go givssideami, veahkaválddi ja psyhkalaš ja fysalaš dearvvašvuođa, vai dieđášeimmet makkár doaibmabijuid berrešii álggahit.

 

Ruvke ja energiija

Sámediggi oaččui maiddái vejolašvuođa hállat birasváikkuhusaid birra maid guolástusealáhusas ja boazodoalus vásihit ruvkedoaimma geažil sámi guovlluin, ja ahte sámi boazodoalloguovllut gártet gillát birasáddjás energiijaávkkástallama ásahemiin, nu go biegga- ja čáhcefápmorusttegiid geažil.

Dát čuohcá sámi mánáid bajásšaddaneavttuide negatiivvalaččat.

 

Čoahkkimis ledje Redd barna, Mánáidkonvenšuvdna Foruma, Mánáidáittardeaddji, Norgga nationála olmmošvuoigatvuođaásahusa ja Sámedikki ovddasteaddjit.

Fáddásánit
Ođđasat

På forsiden nå