Katalonia guovllu presideanta Carles Puigdemont, seremonias ovddeš Katalonia jođiheaddji ovddas hávdesajis Barcelonas sotnabeaivvi. Son ain háliida ságastallat dálá Madrida ráđđehusain, juoga maid stáhtaministtar Mariano Rajoy muitala ii leat duohta. Govven: Manu Fernandez / AP / NTB Scanpix

Katalonia ferte duorastahkii heaitit jurdda­šeames sorjjakeahtes­vuođa birra

Katalonia jođiheaddji Carles Puigdemont ferte ovdal duorastaga heaitit sorjjakeahtesvuođa birra jurddašit, gáibida Madrida ráđđehus.

15:32 Golggotmánu 16. beaivi 2017

Spánia sadjásaš stáhtaministtar Soraya Sáenz de Santamaria muitala Puigdemont ferte čuovvugoahtit riikka lágaid, áigemearri lea biddjon duorastahkii.

– Ii galggaše leat váttis jierbmagoahtit dan boahtte golmma beaivvis, muitala Sáenz de Santamaria.
 

Puigdemont ii vástidan

Vuossárgga ovdalgaskabeaivvi reagerii son go Puigdemont ii vástidan gažaldahkii iešmearrideami birra, man Spánia ráđđehus sáddii čálalaččat.

Spánia ráđđehus lea dáhtton čielga vástádusa Katalonia guovllu eiseválddiin ovdal diibmu 10 vuossárgga, gullan dihtii leat go julggaštan sorjjakeahtesvuođa vai eai.

Sadjásaš stáhtaministtar oaivvilda ahte Katalonia jođiheaddji ii leat vástidan gažaldagaid maid ráđđehus lea jearran sus.

– Ii livčče nu váttis dadjat jo dahje ii. Lei dat mii lei min gažaldat, ja vástádus ii galggaše nu moalkái, dajai son vuossárgga go Puigdemontii attii ođđa áigemeari.

 

Ožžo ođđa áigemeari

Ođđa áiggemearri lea duorastatiđida. Jus Puigdemont ii leat čuvvon lága dan rádjái, de árvvoštallagoahtá guovddášráđđehus vejolašvuođa čađahit vuođđolága páragráfa 155, mii addá Madridii vejolašvuođa váldit badjelasas osiid Katalonia dálá iešmearrideamis.

Gáibádus bođii maŋŋel go Puigdemont maŋŋebárgga iđđedis ovddit vahkku geažuhii sorjjakeahtesvuođa, muhto maŋidedje dan sávvan dihtii háleštit Spánia guovddášráđđehusain.

På forsiden nå