LOGI JAGI POLITIHKKEN: Vibeke Larsen ii beassan dán áigodaga Sámediggái. Govven: Sárá Máret Rávdná Oskal.

Illuda Sáme­dikki oaidnit olggo­beale olbmuid čalmmii­guin

Vibeke Larsen illuda dál go beassá luoitit Sámedikki ja eallit eambbo priváhta eallima.

08:58 Golggotmánu 12. beaivi 2017
Ođastuvvon: 12.10.2017 - 09:36

Gaskavahkku, Sámedikki rahpamis, lei Vibeke Larsena maŋemuš beaivi Sámediggepresideantta ámmáhis. Goit dán vuoru.

– Lea allaáiggálaš beaivi, dan dovdá vuoiŋŋas, ja go oaidná visot čiŋadan olbmuid, lohká Larsen rahpama birra.

 

– Sámepolitihkka lea hástaleaddji

Vibeke Larsen ii beassan Sámediggái dán áigodaga. Son lohká illudit beassat eallit eambbo priváhta eallima, maŋŋil go lea logi jagi leamaš ollesáigge politihkkárin.

 

– Movt dat orru go boahtte áigodaga it leat Sámedikkis?

– Dasa lean ráhkkanan, ja illudan eallit eambbo priváhta eallima. Illudan maid oaidnit Sámedikki olggobeale olbmuid čalmmiiguin. Logi jagis lean deaivan olu olbmuid ja oaidnán man máŋggadáfot Sápmi lea. Lea leamaš somá, muhto hástaleaddji. Go sámepolitihkka lea hástaleaddji. Leat nu olu dárbbut, muhto eat nagot buot gokčat, lohká Vibeke Larsen.

 

Vuos árrat

– Leat go njealji jagi geahčen fas Sámedikkis?

– Lea vuos árrat dan lohkat, dan in leat vuos mearridan, reašká Larsen.

Fáddásánit
Ođđasat

På forsiden nå