VIRGÁDAN GÁICCAID: Statnett lea virgádan 15 gáicca. Geahččalanprošeavttas galget gávnnahit sáhttá go gáica adnot linjáčorgejeaddjin. Govva: Newswire

Gáiccat dienas­barggus Stat­nettas

Statnett áigu guorahallat sáhttet go gáiccat veahkkin čorget elfápmolinjjáid vuolde.

10:35 Golggotmánu 17. beaivi 2017

Statnett lea dál álggahan geahččalanprošeavtta mas 15 gáicca leat mielde.

Statnett áigu gávnnahit sáhttet go gáiccat veahkkin čorget elfápmolinjjáid vuolde, ja makkár ávki lea das jus gáiccat guhtot juste vuolde, dan dieđiha Newswire ođasfitnodat preassadieđáhusas.

– Mii njáskat linjjáid vuolde juohke gávccát jagi. Buot mii sáhttá šaddat nu stuorisin ahte guoská kábeliidda, fertejit eret, lohká Ellen Torsæter Hoff, Statnett biras ja lobiid seniorráđđeaddi.

 

Eai šatta ođđa muorat

Lea dávjá nu ahte muorat leat gahččan linjjá ala jus elfápmu jávká Norggas.

– Gáiccat adnojit eanet ja eanet eanadatdikšumii. Jus sáhttit gáiccaid atnit doalahit čorgadin linjjáid vuolde, ja vaikke váldit muhtun muoraid ovdal go šaddet beare stuorisin, de lea hui miellagiddevaš, lohká Hoff.

– Jus muora sahe, de šaddet ođđa muorat ruohttasiin, ja šaddá fas muhtun jagiid maŋŋel sahet dan. Jus gáica guohtu dan, de jápmá ruohtas, lohká Hoff.

 

Virtuála áidi

Statnett geahččala dan prošeavtta ođđa teknologiijain, «Nofence». Norgga biras- ja biodieđalaš universitehta galgá analyseret bohtosiid.

– Eat sáhte áidut gáiccaid elfápmolinjjáid vuollai, jus galgá álkes bargu, de fertet sáhttit sirdit gáiccaid, nu ahte eat dárbbat áiddiid sirdit, lohká Hoff.

Juohke gáiccas lea elektrovnnalaš biellu mas lea GPS. Dat dieđiha gáicii jus manná olggobeallái guohtunguovllu.

– Jus gáica boahtá olggobeallái mearriduvvon guovllu, de gullogoahtá jietna. Jietna šaddá jitnoseabbon mađi guhkkelii ealli manná, dássážii go jorggiha. Jus ii jorggit, de sáddejuvvo elrávdnji biellu čađa, gáicii, lohká Magnus Gabrielsen Nofence fitnodagas.

Fáddásánit
Ođđasat

På forsiden nå