Boahtte vahkku rájes ii galgga šat leat divraseappot riŋget fitnodagaid bálvalustelefuvnnaide go eará mátke- ja viessotelefunnummiriidda. Čájáhusgovva: Terje Bendiksby / Scanpix

Bálvalus­nummirat hálbot

Olu geavaheaddjit leat gártan máksit divrasin go riŋgejit geavaheaddjibálvalusnummiriidda, muhto dál it dárbbaš šat dainna váivašuvvat.

12:36 Golggotmánu 13. beaivi 2017

Dássážii leat olu Norgga fitnodagat geavahan sihke 3- ja 5-siffar nummiriid maidda geavaheaddjit gártet riŋget jus dárbbašit bálvalusaid.

Dákkár nummiriin lea divrras minuhttahaddi ja geavaheaddjái gártá divrrasin riŋget.

Sihke márkanfievrredanláhka ja EU-duopmostuollu gieldá ealáhusdolliid geavaheddjiid čujuhit divrras erenomášnummiriidda, sidjiide galgá seamma divrras čuojahit go dábálaš mátke- ja viessotelefovnnaide.

Fitnodagat leat ožžon áigemeari čuovvolit lága ovdal golggotmánu 15. beaivvi, čállá NTB.

 

Ávžžuhit váidit

Jus fitnodagat eai čuovvol lága, de ávžžuha mánáid- ja dásseárvoministtar geavaheddjiid váidit fitnodagaid geavaheddjiidráđđái.

– Mun vuorddán ahte buot fitnodagat heitet geavaheames divrras erenomášnummiriid go geavaheaddjit galget riŋget sidjiide. Geavaheddjiidáittardeaddji galgá gozihit dán ja čađahit bearráigeahčuid. Fitnodagat mat rihkkot lága sáhttet sáhkohallat, dadjá dásseárvoministtar Solveig Horne preassadieđáhusas.

Fáddásánit
Ođđasat

På forsiden nå